Ким Чен Ин Шимолий Корея танкларини янгилаш зарурлигини маълум қилди

КХДР етакчисининг сўзларига кўра, техникаларни ишлаб чиқаришда «танкларнинг замонавий урушдаги функцияси ва ролини аниқ белгилай олиш керак».

Фото: KCNA/Reuters

КХДР етакчиси Ким Чен Ин мамлакатдаги «муҳим» танк заводига ташриф буюди, деб хабар беради Корея Марказий телеграф агентлиги.

Қайд этилишича, у қисқа вақт ичида Корея халқ армиясининг зирҳли техникалар паркини янгилаш зарурлигини айтган. Шунингдек, Ким Чен Ин танк ишлаб чиқаришдаги ютуқларни эътироф этган ва «ишлаб чиқаришда иккинчи инқилобни амалга оширишга» чақирган.

«Ким Чен Ин қуруқликдаги қўшинларимизнинг ўтган асрдаги зирҳли техникасини энг сўнгги танклар ва зирҳли машиналар билан алмаштириш Қуролли кучлар қурилиши ҳамда қуруқликдаги қўшинларни модернизация қилишдаги энг муҳим масала эканини таъкидлади», — дейилади хабарда.

Ким Чен Иннинг қўшимча қилишича, техникаларни ишлаб чиқаришда «танкларнинг замонавий урушдаги функцияси ва ролини аниқ белгилай олиш керак». Унинг сўзларига кўра, айни вақтда жанговар ҳаракатлар олиб боришнинг «субъектив ва объектив шартлари ўзгарган».

Аввалроқ КХДР етакчиси Ким Чен Ин «қўпол империалистик қароқчилар»га қарши кураш бўйича миссияларни бажарадиган ва КХДР ҳарбий-денгиз кучлари таркибига кирувчи янги кўп мақсадли Чвэ Рён кемасини (эсминец) сувга тушириш маросимида иштирок этгани тўғрисида хабар берилганди.