Зеленский Чехияда: Россия билан сулҳга исталган вақтда эришиш мумкин

Украина президенти Володимир Зеленский 4 май, якшанба куни Чехия Республикасига ташрифи чоғида бўлиб ўтган матбуот анжуманида Россия билан исталган вақтда ўт очишни тўхтатиш мумкинлигини айтди. «Биз ишонамизки, Россия босим кучайтирилмаса, урушни тугатиш учун реал қадамлар қўймайди. Бугун Россия ҳатто Американинг тўлиқ ўт очишни тўхтатиш таклифини ҳам эътиборсиз қолдирганига 54 кун бўлди», — деди Зеленский чехиялик ҳамкасби Петр Павел билан бўлиб ўтган қўшма матбуот анжуманида.

«Биз ўт очишни тўхтатишга ҳар қандай вақтда, ҳатто бугундан бошлаб ҳам эришиш мумкин, деб ҳисоблаймиз ва дипломатияга ҳақиқий имконият бериш учун камида 30 кун давом этиши керак», — дея таъкидлади Украина раҳбари.

Аввалроқ, Россия президенти Владимир Путин 9 май куни Ғалаба байрамини нишонлаш давомида уч кунлик сулҳ эълон қилган эди. Зеленский бу таклифни «манипуляция» деб атаган ва Москвадаги парад давомида қисқа муддатли ўт очишни тўхтатиш ўрнига, ҳеч бўлмаганда жанговар ҳаракатларни 30 кун ичида тўхтатиш бўйича келишиб олиш мақсадга мувофиқлигини яна бир бор таъкидлади.

9 май Ғалаба парадида танкларни майдонга тушириш ўрнига, Путин «ўз урушини ҳақиқатда қандай тугатиш ҳақида» ўйлаши керак, деди Украина президенти. «Уч нарса керак: Россияга қарши санкцияларни кучайтириш, Украинани қўллаб-қувватлашни давом эттириш ва Европа бўйлаб мудофаа соҳасидаги ҳамкорликни сезиларли даражада кенгайтириш. Россия билиши керакки, европаликлар ўзларини ҳимоя қиладилар», — деди Зеленский.