Россияда қурилишдаги ноқонуний мигрантларни аниқлаш учун дрондан фойдаланилди

«Росгвардия» ходимлари Краснодар шаҳри полициясига қурилиш майдонларида ноқонуний мигрантларни топишда ёрдам бериш учун дронлардан фойдаланди. Квадрокоптерлардан олинган видеони «Росгвардия» Краснодар ўлкаси бўйича бош бошқармаси эълон қилди.

Кадрларда дрон янги қурилаётган кўпқаватли уй хоналарини текшираётгани ва яширинган одамларни топгани кўрсатилган.

Қайд қилинишича, полиция икки қурилиш объектидаги 100 дан ортиқ хорижлик ишчиларни текширишга муваффақ бўлган.

«Рухсатсиз ишлаётган марказий осиёлик 14 нафар ноқонуний мигрант аниқланди», дейилади хабарда.

Уларни жарима ва депортация кутмоқда. ОМОН ва СОБР ходимлари мигрантларни тинтув қилган. Бу жараён «профилактика» деб номланган.

Аввалроқ, Россия қурилиш майдонларида ишлаётган мигрантлар сони 500 минг кишини ташкил қилиши, бу 2024 йил бошига нисбатан мутлақ кўрсаткичларда 15-20 фоизга кам экани айтилган эди. Бу ҳолат Россияда қурилиш соҳасининг секинлашиши ва бир вақтнинг ўзида миграция сиёсатининг кескинлашуви туфайли ишчи кучига бўлган эҳтиёжнинг камайиши билан изоҳланди.