Трамп «барча»ни Теҳрондан тезроқ чиқиб кетишга чақирди

АҚШ президенти Доналд Трамп Канадада бўлиб ўтаётган «Катта еттилик» (G7) саммитини Яқин Шарқдаги вазият туфайли муддатидан олдин тарк этди. Бу ҳақда Оқ уй расмий вакили Кэролайн Левитт маълум қилди. 

«Яқин Шарқда рўй бераётган воқеалар туфайли президент Трамп бугун давлат раҳбарлари билан кечки овқатдан кейин кетади», – дея ёзган Левитт X ижтимоий тармоғидаги саҳифасида. 

Бундан бироз олдинроқ Трамп ўзининг Truth Social ижтимоий тармоғидаги саҳифасида барчани Эрон пойтахти Теҳрондан эвакуация бўлишга чақирганди. 

«Эрон мен имзолашни айтган „битим“ни имзолаши керак эди. Нақадар шармандалик ва инсонлар умри зое кетиши. Содда қилиб айтганда, Эрон ядро қуролига эга бўла олмайди. Мен буни қайта-қайта такрорладим! Ҳамма зудлик билан Теҳрондан эвакуация қилиниши керак!» – дея ёзган Трамп.

У нима учун эвакуацияга чақирганини изоҳламади.

The Jerusalem Post маълумотига кўра, Трамп Эронга ядровий келишув бўйича «сўнгги таклифи»ни бермоқчи. Шу билан бирга, АҚШнинг келишув бўйича ҳар қандай таклифи Эрон фуқаролик атом энергетикаси ва илмий фаолият учун ҳам уранни бойитишдан бутунлай воз кечиши шартини ўз ичига олади. Эрон бу шартни номақбул деб ҳисоблайди.

Олдинроқ The Wall Street Journal Эрон расмийлари араб дунёси мамлакатларидаги воситачилар орқали Исроил ва АҚШга норасмий хабарлар юбориб, ҳарбий ҳаракатларни тўхтатиш ва ўз ядровий дастури бўйича музокараларни қайта бошлашга интилаётгани ҳақида ёзганди.