ЖССТ зарарли маҳсулотлар нархини оширишга чақирди

Жаҳон соғлиқни сақлаш ташкилоти (ЖССТ) дунё давлатларини тамаки, алкогол ва ширин ичимликларнинг ҳақиқий нархини оширишга чақирди. Бу ҳақда ташкилот сайтида эълон қилинган баёнотда сўз боради.

«ЖССТ зарарли маҳсулотларга солинадиган солиқларни оширишни таклиф қилади — бу соғлиқни сақлаш манфаатларида ва миллионлаб одамларнинг ҳаётини сақлаб қолиш мақсадида амалга оширилиши керак. Бугун ЖССТ янги йирик ташаббус билан чиқди ва унда давлатлар 2035 йилгача тамаки, алкогол ва ширин ичимликларнинг ҳақиқий нархини ҳеч бўлмаганда 50 фоизга оширишга чақирилмоқда», — дейилади ҳужжатда.

Баёнотда айтилишича, бундай чоралар сурункали касалликларга қарши курашиш ва давлат бюджети учун муҳим даромад манбаини таъминлаш мақсадида зарур. ЖССТ маълумотларига кўра, тамаки, алкогол ва ширин ичимликлар истеъмоли юрак хасталиклари, саратон ва диабет каби юқумли бўлмаган касалликлар сонининг ортишига сабаб бўлмоқда.