Исроил ҲАМАСни ўт очишни тўхтатиш таклифини ўзгартиришга уринишда айблади

Исроил музокара гуруҳи тез орада маслаҳатлашувлар учун Қатарга боради.

Фото: Anadolu Agency

Исроил ҲАМАСни Қатарнинг Ғазо секторида ўт очишни тўхтатиш ҳақидаги таклифини ўзгартиришга уринаётганликда айблаб, ўзгаришларни қабул қилиб бўлмас деб атади.

Исроил бош вазири канцелярияси томонидан эълон қилинган баёнотда ҲАМАСнинг Қатар воситачилари томонидан илгари тақдим этилган келишув лойиҳасига ўзгартириш киритиш бўйича таклифлари Исроил томонига топширилгани қайд этилди.

«ҲАМАСнинг Қатар таклифига киритмоқчи бўлган ўзгаришлари Исроил учун қабул қилиниши мумкин эмас», — дейилади баёнотда.

Исроил бош вазири Бинямин Нетаняҳу, Исроил томони маъқуллаган таклиф шартларига кўра, Ғазода сақланаётган асирларни озод қилиш учун билвосита музокаралар ва саъй-ҳаракатларни давом эттиришга кўрсатма бергани таъкидланди.

Исроилнинг музокаралар гуруҳи яқин орада сулҳ битими бўйича маслаҳатлашувларнинг навбатдаги босқичида иштирок этиш учун Қатарга бориши кутилмоқда.

Ўтган ҳафта ҲАМАС ҳаракати воситачиларга Исроил билан ўт очишни тўхтатиш таклифига ижобий муносабатда эканини билдирди ва ўт очишни тўхтатиш ҳамда асирлар алмашиш келишувини амалга ошириш мақсадида музокараларга тайёрлигини таъкидлади.