Испанияда «Ростех» вице-президентининг ўғли ушланди. У пул ювишда гумонланмоқда

Дмитрий Артяковнинг бувиси Испания банкидаги ўз ҳисобрақамига заём кўринишида 12,7 млн евро олган ва бу пулга кўчмас мулк харид қилган. Кейинроқ эса мулк набираси номига ўтказилган.

Дмитрий Артяков

Испаниянинг Жирона шаҳрида «Ростех» вице-президенти Владимир Артяковнинг ўғли Дмитрий Артяков ҳибсга олинди, деб хабар беради The Insider.

Қайд этилишича, Артяков пул ювишда гумонланмоқда. Нашр маълумотларига кўра, унинг бувиси Анна Курепина Испания банкидаги ўз ҳисобрақамига заём кўринишида 12,7 миллион евро олган ва бу пулга кўчмас мулк харид қилган. Кейинроқ эса мулк набираси номига ўтказилган.

Испания ҳуқуқ-тартибот органлари заём қайтарилмаганини аниқлаган. Уларнинг версиясига кўра, Курепинанинг ҳисобрақамига келиб тушган пуллар юрист Сергей Магнитский фош этган солиқларни қайтариш схемаси бўйича Россия бюджетидан ўғирланган.

Дмитрий Артяков 2022 йилдан бери Украина, АҚШ ва Канада санкциялари остида ҳисобланади. Аммо ЕИ унга нисбатан санкция қўлламгаан, шу боис у Испания ҳудудида қонуний юриши ва кўчмас мулкка эгалик қилиши мумкин.