Мерц: АҚШ божлари Германия экспортига қаттиқ таъсир қилади

Германия канцлери Фридрих Мерц 13 июл, якшанба куни ARD телеканалига берган «ёзги интервю»да АҚШ президенти Доналд Трамп 1 августдан Европа товарларига жорий қилмоқчи бўлган 30 фоизлик АҚШ божлари «Германия экспортига жиддий зарба беради» деди.

Сиёсатчининг қўшимча қилишича, агар бу содир бўладиган бўлса, Берлин ўзининг иқтисодий сиёсатидаги саъй-ҳаракатларининг «катта қисмини орқа ўринга қўйишга» мажбур бўлади: «Чунки у қолган ҳамма нарсага соя солади». Бироқ у Европа Вашингтон билан август ойи бошига қадар келишувга эриша олишига умид қилмоқда. Акс ҳолда, у Франция президенти Эммануэл Макрон сингари, оммавий жавоб тарифларини жорий этишни қўллаб-қувватлайди.

Доналд Трампнинг ўзи Европа Иттифоқи томонидан савдо тарифлари жавоб тариқасида оширилган тақдирда Вашингтон симметрик тарзда ҳаракат қилишини билдирди.

Худди шу интервьюда Фридрих Мерц «бургергелд» (немисча Bürgergeld — фуқаролар учун пул) фуқаролик нафақаларини тўлашни қисқартириш тарафдори эканини айтган. У ҳозирда иш излаётган ёки даромади ўзини ўзи боқиш учун етарли бўлмаганлар томонидан олинади.

Федерал канцлер муҳтожларни қўллаб-қувватлашни давом эттиришини тасдиқлади, аммо ариза берувчилар учун қаттиқроқ қоидалар жорий этиш ниятида эканини маълум қилди. "Ишлай оладиган одамлар ишлаши керак. Уй-жой нархига нисбатан қаттиқроқ талаблар ҳам мумкин, масалан, ижара тўловини жорий этиш ёки яшаш майдонини текшириш".