Мерц Трампнинг Украина учун қурол бўйича ташаббусини олқишлади

Германия канцлери Фридрих Мерц АҚШ президенти Доналд Трампнинг Европа давлатлари ҳисобидан Украинага қурол етказиб бериш ғоясини олқишлади. «Президент Трамп бугун муҳим ташаббус билан чиқди: агар европалик ҳамкорлар молиялаштирса, АҚШ Украинани катта миқдорда қурол-яроғ билан таъминлайди», — деб ёзди Мерц 14 июл, душанба куни ўзининг Х  аккаунтида.

Унинг сўзларига кўра, бу ташаббусни Трамп билан «сўнгги кунларда» муҳокама қилган ва Америка президентини Германия «бунда ҳал қилувчи рол ўйнашига» ишонтирган. «Биз буни ўз манфаатларимиз йўлида қиляпмиз. Бу Украинага Россия бомбардимонлари даҳшатидан ўзини ҳимоя қилишга ёрдам беради. Бу Москвага босимни кучайтиришнинг ягона йўли, натижада у ниҳоят тинчлик музокараларига рози бўлади», деб давом этди федерал канцлер.

Журналистларнинг АҚШ ва унинг иттифоқчилари Украинага Patriot ҳаво мудофаа тизимларини етказиб беришни режалаштиряптими, деган саволига Доналд Трамп 14 июл куни НАТО бош котиби Марк Рютте билан учрашувда бу «бир неча кун ичида» амалга ошишини айтди.

«Бизда 17 та Patriot тизимини етказиб беришга тайёрланаётган битта мамлакат бор. Уларга керак бўлмайди. Шунинг учун биз бу 17 тасининг аксарияти қаерга кетишини келишиб оламиз. Улар уруш томонига боради», — дея қўшимча қилди Трамп.

Унинг сўзларига кўра, Patriot бўйича битимда ушбу тизимларга эга бўлган бир қанча давлатлар иштирок этади. Улар уни «алмаштиради», деди Трамп. «Украина ҳақиқатда катта миқдорда ҳарбий техника олади: ҳаво мудофааси ҳам, ракеталар ва ўқ-дорилар ҳам», — деди Рютте.