Хитой: Россияга қарши санкциялар Хитой ва ЕИ муносабатларига зарба берди

Хитой Савдо вазирлиги Европа Иттифоқининг Россияга қарши янги санкциялари Пекин ва Брюссел муносабатларига салбий таъсир кўрсатаётганини маълум қилди. Гап 18 июл куни Россиянинг Украинага қарши давом этаётган тажовузи муносабати билан Европа Иттифоқида қабул қилинган Москвага қарши чеклов чораларининг 18-пакети ҳақида кетмоқда.

«Европа Иттифоқининг ҳаракатлари Хитой ва ЕИ раҳбарлари ўртасида эришилган келишувларга зид келади ҳамда Хитой ва ЕИ ўртасидаги савдо муносабатлари ва молиявий ҳамкорликка жиддий салбий таъсир кўрсатади», — деди вазирлик вакили Пекинда журналистларга.

Брюссел томонидан киритилган чекловлар Россиянинг «соядаги» флоти 105 танкерига таъсир қилди. Россия нефтининг нархи бир баррел учун 47,6 долларгача пасайтирилди. Хитойнинг иккита банки – Heihe Rural Commercial Bank ва Heilongjiang Suifenhe Rural Commercial Bank ҳам санкциялар рўйхатига киритилган. Европа Иттифоқи маълумотларига кўра, ушбу молия институтлари криптовалюта операциялари билан шуғулланган, бу эса Москвага қарши санкциялар самарадорлигига путур етказган.

Пакет Россия ҳарбий-саноат комплексига тўғридан тўғри ёки билвосита ёрдам кўрсатувчи ёки санкциялардан қочишда иштирок этувчилар рўйхатига 26 та ташкилотни қўшди. Улардан еттитаси Хитой ва Ҳонгконгда жойлашган.