UzXCMG давлат улушини сотиш бўйича Хитой компанияси билан ҳамкорлик қилинади

V Тошкент халқаро инвестиция форуми доирасида хусусийлаштиришга оид иккита битим имзоланди, дея хабар берди Давлат активларини бошқариш агентлиги.

Битимлардан бири Mobiuz мобил операторини АҚШнинг McKim and Company компаниясига 351 млн долларга сотишга оид. Иккинчиси эса – UzXCMGʼдаги давлат улушини хусусийлаштириш бўйича Хитойнинг XCMG Construction Machinery Co., Ltd компанияси билан ҳамкорлик меморандуми.

Расмий хабарга кўра, меморандум Давлат активларини бошқариш агентлиги ҳамда XCMG Construction Machinery Co., Ltd ўртасида “UzXCMG” МЧЖ устав капиталидаги давлат улушини хусусийлаштириш жараёнини самарали амалга ошириш мақсадида имзоланган.

Ҳужжатда томонлар ўртасида ҳамкорликни йўлга қўйиш, тажриба алмашиш ва саъй-ҳаракатларни мувофиқлаштириш орқали хусусийлаштириш жараёнининг самарадорлиги ҳамда шаффофлигини таъминлаш назарда тутилган.

Kun.uz’нинг аниқлик киритиш ҳақидаги сўровига жавобан Давлат активларини бошқариш агентлиги мазкур ҳужжат UzXCMG’ни сотиш бўйича битим эмаслигини билдирди. Агентликка кўра, корхонанинг 50,9 фоиз улуши аллақачон Хитойнинг XCMG HK International Corporation Development Company Limited компаниясига тегишли бўлиб, имзоланган ҳужжат давлат улушини хусусийлаштириш жараёни бўйича ҳамкорлик меморандуми ҳисобланади.

«Бу олди-сотди шартномаси эмас. Шунинг учун мазкур босқичда битим қиймати ҳақида гап бўлиши мумкин эмас. Меморандум хусусийлаштириш жараёнида ҳамкорлик қилишни назарда тутади. Агар компаниянинг ўзида қизиқиш бўлса, давлат улушини сотиб олиши мумкин. Шунингдек, у бошқа стратегик инвесторларни жалб қилишда ҳам кўмаклашиши мумкин», - дея изоҳ берди агентлик.

UzXCMG ҳақида

UzXCMG қўшма корхонаси 2014 йилда Хоразмда ташкил этилган бўлиб, тоғ-кон саноати ва ерости конлари учун техника ишлаб чиқариш билан шуғулланади. Корхонанинг устав фонди 81 млрд сўмни ташкил этади.

Корпоратив реестрга кўра, компания улушларининг 50,9 фоизи XCMG HK International Corporation Development Company Limited’га, 49,1 фоизи эса Давлат активларини бошқариш агентлигига тегишли.

Эслатиб ўтамиз, президентнинг 2023 йилдаги 102-сон қарори билан UzXCMG МЧЖдаги давлат улушини хусусийлаштириш режалаштирилган эди. Мазкур ҳужжатда «Ўзбекистон темирйўллари» АЖ тизимидаги 33 та корхонани хусусийлаштириш назарда тутилган бўлиб, улар қаторида UzXCMGʼдаги 49 фоизлик давлат улушини оммавий савдоларга чиқариш режаси ҳам кўрсатилган.