Исроил дрони Ливанда ўрмон ёнғинига сабаб бўлди

Исроил армияси ҳозирча ҳужум ҳақида маълумот бермаган.

Фото: Anadolu Agency

Исроил ҳарбий-ҳаво кучларининг учувчисиз учоғи Ливан жанубидаги Тир ва Ятир шаҳарлари яқинидаги ўрмонларга ёндирувчи бомбалар ташлади. Бу ҳақда Ливаннинг NNA ахборот агентлиги хабар берди.

Хабарга кўра, дрон ҳужуми ўрмон ёнғинига сабаб бўлган. Ёнғинни ўчириш учун Ливан фуқаролик мудофааси бўлинмалари сафарбар этилган. Исроил армияси ҳозирча ҳужум ҳақида маълумот бермаган.

Исроил ва Ливан ўртасида 2024 йил 27 ноябрда имзоланган сулҳ битимига қарамай, Исроил томони унинг шартларини мунтазам равишда бузмоқда.

Ливанга қуруқликдан уюштирилган ҳужумлар чоғида бир қанча чегара шаҳарларига кирган Исроил қўшини, келишувнинг тўлиқ чекинишни талаб қиладиган бандига қарамай, беш нуқтада позицияларини эгаллашда давом этмоқда.