АҚШ Украинадаги уруш қачон тугаши кераклигини белгилади

Доналд Трамп эълон қилган 10 кунлик муҳлат 8 августда тугаши айтилди.

Фото: Getty images

АҚШ президенти Доналд Трамп аниқ маълум қилганидек, Украинадаги уруш 8 августга қадар тўхтатилиши керак. Бу ҳақда Бирлашган Миллатлар Ташкилотидаги АҚШ доимий вакили Жон Келли айтди. РБК унинг сўзларидан иқтибос келтирди.

«Россия ҳам, Украина ҳам ўт очишни тўхтатиш ва мустаҳкам тинчлик ўрнатиш бўйича келишиб олиши керак. Битим тузиш вақти келди. Президент Трамп бу 8 августгача амалга оширилиши кераклигини аниқ айтди. Қўшма Штатлар тинчликни таъминлаш учун қўшимча чоралар кўришга тайёр», деди у БМТ Хавфсизлик кенгаши йиғилишида.

8 августда Трамп томонидан Россияга нисбатан ўрнатилган 10 кунлик ултиматум муддати тугайди. Ушбу муддат тугагач, АҚШ президенти можарони ҳал қилишда олдинга силжиш бўлмаса, Россия ва унинг савдо ҳамкорларига нисбатан «тахминан 100 фоиз» иккиламчи божлар жорий этишга ваъда берган.

Кремл Трампнинг баёнотларини маълумот учун қабул қилганини айтди. Россия президенти матбуот котиби Дмитрий Песков Россия иқтисодиёти «улкан миқдордаги санкциялар» остида ишлашда давом этаётгани ва уларга қарши «муайян иммунитет» ҳосил қилганини таъкидлади.

Ултиматумдан кейин АҚШ президенти Доналд Трамп ва Россия собиқ президенти Дмитрий Медведев ижтимоий тармоқларда тортишиб қолди.