Санду Россияни Молдовадаги сайловларга аралашишни режалаштирганликда айблади

Молдова президенти Майя Санду Россия расмийлари мамлакатда 28 сентябрга белгиланган парламент сайловларига аралашиш ниятида, деб ҳисоблайди. У бу ҳақда матбуот анжуманида маълум қилди. Трансляция унинг Facebookʼдаги саҳифасида амалга оширилди.

«Россия Федерацияси жорий йилнинг кузидан бошлаб Молдова Республикаси устидан назорат ўрнатиш ниятида ва сентябрдаги сайловларга мисли кўрилмаган даражада аралашиш режасини тайёрламоқда», — деди Санду.

«Россиянинг мамлакатимиз ички ишларига аралашувининг энг катта хавфи шундаки, у мамлакатимизнинг миллий хавфсизлиги, суверенитети ва Европа келажагига бевосита таҳдид солади», — дея қўшимча қилди президент.

Унинг сўзларига кўра, «фақат криптовалюталар орқали 100 миллион еврога яқин маблағни молиялаштириш режалаштирилган». Reuters таъкидлаганидек, Санду Россиянинг режалари ҳақида ҳеч қандай аниқ далил келтирмаган.

Россия президенти матбуот котиби Дмитрий Песков бу айбловларни рад этиб, Москва «бошқа давлатларнинг ички ишларига аралашмаслигини» айтди.