“Чикунгуня безгаги Ўзбекистонда тарқалмайди” – Санэпидқўмита

Хитойда кўпайган чикунгуня безгаги Ўзбекистонда тарқалмайди. Бу ҳақда Санитария-эпидемиология қўмитаси маълум қилди.

Унга кўра, ушбу касалликни тарқатувчи чивинлар Ўзбекистон табиатида учрамайди.

Хитойнинг Гуандун провинциясида бир ҳафта ичида 2800 нафардан ортиқ инсонда чикунгуня безгаги аниқланган. 27 июлдан 2 августга қадар вирус юқтириш билан боғлиқ 2892 та янги ҳолат қайд этилган.

“Эпидемия авж олиши жиловланди, бироқ касаллик юқтирувчи чивинлар сабабли унинг профилактикаси ва назорати борасида жиддий муаммолар мавжуд”, деганди Гуандун провинцияси касалликларни профилактика ва назорат қилиш марказининг юқумли касалликлар бўйича бош эксперти Кан Мин.