Аляскадаги учрашув Путин учун синов – НАТО бош котиби

Марк Рютте АҚШ ва Россия раҳбарларининг саммити «Путин учун синов» эканини айтди. Шунингдек, Россия Украинанинг ўз тақдирини ўзи белгилаш ҳуқуқини тан олиши кераклигини таъкидлади.

Фото: Reuters

НАТО бош котиби Марк Рютте Аляскада АҚШ президенти Доналд Трамп ва Россия президенти Владимир Путин ўртасида бўлиб ўтадиган саммит Украинадаги урушни тўхтатиш йўлидаги муҳим синов бўлишини айтди.

«Кейинги жума муҳим бўлади, чунки Путин бу даҳшатли урушга нуқта қўймоқчи экани қанчалик жиддийлиги текширилади. Кенг кўламли музокараларга келганда, умид қиламизки, жума куни бу жараёнда муҳим қадам ташланади... Гап ҳудуд ҳақида боради. Гап, албатта, хавфсизлик кафолатлари ҳақида, шунингдек, Украина ўз келажагини ўзи белгилашини, Украина ўз геосиёсий келажагини ўзи белгилайдиган суверен давлат бўлиши кераклигини тан олишнинг мутлақ зарурати ҳақида боради - албатта, ўз Қуролли кучлари сонида ҳеч қандай чекловларсиз. НАТО учун эса - шарқий қанотда бўлиш учун ҳеч қандай чекловларсиз», деди Рютте ABC News телеканалига берган интервюсида.

НАТО бош котиби, шунингдек, Россия Украинанинг урушдан олдинги ҳудуди бир қисмини назорат қилаётганини тан олди.

«Ушбу ҳудудий масалаларнинг барчаси ҳақида гап кетганда, тан олиш ҳақида гап кетганда, масалан, Россия Украинанинг бир қисмини амалда назорат қилаётгани ҳақидаги келажакдаги келишувда, бу де-юре сиёсий тан олиш эмас, балки амалда тан олиш бўлиши керак», деди у.

Сўнгги кунларда Трамп эҳтимолий тинчлик келишуви доирасида «айрим ҳудудларни алмашишни» таклиф қилгани ҳақида хабар берилди. Аммо Украина президенти Володимир Зеленский ўт очишни тўхтатишга эришиш учун Украинанинг ҳар қандай ҳудудларини, хусусан, шарқий Донбассни бериш имкониятини рад этди ва Киевни музокараларда иштирокини таъминлашга чақирди. Европанинг бир қатор давлатлари ҳам тинчлик музокаралари Украинанинг иштирокисиз ўтказилмаслиги кераклигини айтмоқда.