Трамп Зеленский билан учрашувдан олдин "нима қилаётганини яхши билиши"ни айтди

Америка етакчиси ярим йил ичида олтита низони ҳал қилганини таъкидлади.

Фото: Getty images

АҚШ президенти Доналд Трамп Украина ва Европа етакчилари билан учрашуви арафасида фақат аҳмоқларгина у Украина атрофидаги низони ҳал қилиш учун нотўғри ҳаракат қилмоқда деб ҳисоблашларини айтди.

"Мен буни тўхтатиш, бу давом этмаслиги учун шу ердаман. Нима қилаётганимни яхши биламан, менга бу низоларда йиллаб ишлаган ва уларни тўхтатиш учун ҳеч нарса қилолмаган одамларнинг маслаҳатлари керакмас, улар аҳмоқлар, ақли, тушунчаси ва соғлом фикри йўқ одамлар. Улар Россия-Украина фалокати ечилишини қийинлаштиришмоқда", — деб ёзди у Truth Social ижтимоий тармоғида.

Америка етакчиси ярим йил ичида олтита низони ҳал қилганини таъкидлади.

Бугун Вашингтонда Доналд Трамп Украина президенти Володимир Зеленский билан учрашади. Bild нашрининг ёзишича, Трамп Зеленский билан яккама-якка суҳбатлашади.

Сўнгра АҚШ етакчиси Германия канцлери Фридрих Мерц, Буюк Британия бош вазири Кир Стармер, Франция президенти Эммануэл Макрон, Италия бош вазири Жоржа Мелони, Финландия президенти Александр Стубб, Еврокомиссия раҳбари Урсула фон дер Ляйен ва НАТО бош котиби Марк Рютте билан учрашув ўтказади.

Тайёрлаган: Kun.uz Admin

#АҚШ #Доналд Трамп