Россия Киевга ракета ва дронлар билан ҳужум қилди: 14 киши ҳалок бўлди, Евроиттифоқ ваколатхонаси жиддий зарар кўрди

Украина президенти Володимир Зеленский бу ҳужумда бир бола ҳам ҳалок бўлганини айтди. «АҚШ президенти Доналд Трамп урушни тугатиш учун дипломатия йўлидан юрган бир пайтда бу ҳужум Россиянинг дипломатияга берган жавобини кўрсатди», деди у.

«Россия музокара столининг ўрнига баллистикани танламоқда. У урушни тугатиш ўрнига одам ўлдиришни давом эттиришни танламоқда», - деди Зеленский Россияга қарши янги санкциялар жорий этишга чақираркан.

Right now in Kyiv, first responders are clearing the rubble of an ordinary residential building after a Russian strike. Another massive attack against our cities and communities. Killings again. Tragically, at least 8 people have already been confirmed dead. One of them is a… pic.twitter.com/aukkujC9ji

— Volodymyr Zelenskyy / Володимир Зеленський (@ZelenskyyUa) August 28, 2025

Киев прокуратураси келтирган сўнгги маълумотларга кўра, 14 киши, жумладан, уч нафар вояга етмаганларнинг ҳалок бўлгани тасдиқланди. Ҳарбий маъмурият маълумотига кўра, жароҳатланганлар сони 48 нафарга етди.

Қутқарув ишлари давом этар экан, фавқулодда хизматлар ёнғинларни ўчириб, вайрон бўлган биноларнинг харобаларини титкилаб чиқмоқда.

Reutersнинг ёзишича, Киевда ҳаво ҳужуми огоҳлантириши тўққиз соатдан ортиқ давом этди. Портлашлар тунги осмонни ёритиб юборди, дронларнинг ғувиллаши остида осмонни тутун қоплади.

Украина ҳаво кучлари маълум қилишича, Россия мамлакат бўйлаб ҳужум чоғида учирган 598 дроннинг 563 таси ва 31 та ракетанинг 26 таси уриб туширилган. Шунга қарамай, 13 та жойда зарбалар қайд этилган, 26 та жойга дрон ва ракета парчалари тушган.

«Россия ҳужумларининг услуби, афсуски, ўзига хос. Турли йўналишлардан бирлаштирилган зарбалар. Ва мунтазам равишда оддий турар жой биноларини нишонга олиш», - деб ёзди Киев ҳарбий маъмурияти раҳбари Тимур Ткаченко.

Украина расмийлари зарарланган кўплаб бинолар рўйхатини эълон қилди, жумладан, бир неча кўп қаватли турар жойлар ҳам зарар кўрган. Дарницкий туманида, шаҳар шарқий чеккасида, беш қаватли уй қисман вайрон бўлганини айтган Ткаченко қутқарувчилар ҳануз харобалар остидан қолиб кетган аҳолининг изланаётганини қўшимча қилди.

Фавқулодда хизмат ходимлари пойтахтдаги 20 дан ортиқ манзилда ҳужум оқибатларини бартараф этиш устида ишламоқда, деди у.

ЕИ офисига ҳужум

Бундан ташқари, Россия пайшанба куни эрталаб Киевдаги Европа Иттифоқи делегациясини жойлаштирган бинога зарба берди. Натижада бинога катта зарар етди, бироқ ходимлар жароҳат олмади.

Украинадаги ЕИ элчиси Катарина Матхернова бинонинг Россия томонидан кечаси уюштирилган «дрон ва баллистик ракеталарнинг массив зарбаси тўлқинидан» жиддий шикастланганини айтди.

Украина ташқи ишлар вазири Андрий Сибиха Россияни «дипломатларни нишонга олганликда — Вена конвенциясини тўғридан тўғри бузишда» айблади. ЕИ ташқи сиёсат раҳбари Кая Каллас эса бу ҳужумни «можарони атайлаб кучайтириш ва тинчлик саъй-ҳаракатларини масхара қилиш» деб таърифлади.

Politico нашрининг ёзишича, Киевга қилинган ҳужум ЕИ мудофаа вазирлари Копенгагенда йиғилиб, Россияга босимни янада ошириш йўлларини, жумладан, санкциялар ва Украинага ёрдамни муҳокама қилиши кутилаётган кунга тўғри келди.

Европа Кенгаши президенти Антóнио Коста Киевдаги ЕИ делегацияси биносига етказилган зарарни «қасддан қилинган» деб атади.

«Европа Иттифоқи қўрқитилмайди. Россиянинг тажовузи бизнинг Украинани ва унинг халқини қўллаб-қувватлашдаги қатъийлигимизни янада мустаҳкамлайди», деди Коста.

Европа Комиссияси президенти Урсула фон дер Ляйен ЕИ делегацияси ходимлари омон эканини тасдиқлаб, Россияни «фуқаролик инфратузилмасига қарши аёвсиз ҳужумларни дарҳол тўхтатишга» чақирди.

Бу ҳужумлар АҚШ президенти Доналд Трамп урушни тугатиш бўйича тинчлик келишувини тузишга уринаётган пайтда, Россия етакчиси Владимир Путинга босимни кучайтираётган бир вақтда юз берди.

Россия Мудофаа вазирлиги ҳам ўзининг ҳаво мудофаа тизимлари бир кеча-кундузда Украинага тегишли камида етти вилоятни нишонга олган 102 дронни уриб туширганини билдирди. Украина дрон кучлари қўмондони эса кечаси ўтказилган ҳужум чоғида Украина кучлари Афипский ва Куйбишевский нефтни қайта ишлаш заводларига зарба берганини маълум қилди.

Хавфсизлик кафолатлари

Украина ҳар қандай келишувда Ғарб томонидан қўллаб-қувватланган хавфсизлик кафолатларини асосий талаб қилиб қўйган. Бу келажакда Россия ҳужумларининг олдини олиш учун зарур деб таъкидланмоқда. 18 август куни Володимир Зеленский ва европалик етакчилар Оқ уйда йиғилгач, Трамп маъмурияти Европа бошчилигидаги куч Украина хавфсизлигини кафолатлашга ёрдам беришини, разведка воситаларини тақдим этишини, жанг майдонини назорат қилишини ва ҳаво ҳужумидан мудофаа тизимида иштирок этишини қўллаб-қувватлашини билдирди.

Трамп, шунингдек, тез орада Путин ва Зеленский билан уч томонлама учрашув ўтказишини айтди. Лекин Россия президенти Зеленский билан бевосита учрашув ва тинчлик музокараларини чўзиб келмоқда.