АҚШ Россияга санкциялар киритиш билан таҳдид қилди

22 августда Трамп агар Россия-Украина уруши тугамайдиган бўлса, икки ҳафтадан сўнг «жуда муҳим қарор» қабул қилишини айтганди.

Фото: Getty images

АҚШ Россияни Украина билан музокаралар ўтказиш борасида олдинга силжиш зарурлиги ҳақида огоҳлантириб, санкциялар киритиш билан таҳдид қилди, деб хабар берди The Guardian.

Газетанинг ёзишича, бу масала 29 август куни БМТ Хавфсизлик кенгашининг шошилинч йиғилишида муҳокама қилинган. Йиғилиш 27 август куни Россия Киевга зарбалар берганидан сўнг чақирилган.

АҚШнинг БМТдаги маслаҳатчи элчиси Жон Келли бу ҳужум «Россиянинг тинчликка интилишини шубҳага қўйиши»ни билдирган. У Россия ва Украина президентлари ўзаро учрашув ўтказиш борасида келишиб олишлари кераклигини таъкидлаган.

Келли агар низо якунланмайдиган бўлса, президент Доналд Трамп Россияга қарши санкциялар киритишини эслатиб ўтган.

27 августдан 28 августга ўтар кечаси Россия мудофаа вазирлиги Украинадаги ҳарбий-саноат мажмуалари ва ҳарбий авиабазаларга зарба берилганини маълум қилганди.

Аввалроқ, 22 августда Трамп агар Россия-Украина уруши тугамайдиган бўлса, икки ҳафтадан сўнг «жуда муҳим қарор» қабул қилишини айтганди.

#АҚШ #санкция #Россия

Kun.uz янгиликларини Google News'да кузатинг

+ Обуна бўлиш