Финляндияда НАТО қўшинларининг Россия чегараларига энг яқин штаби иш бошлади

Миккели Россия чегарасидан 140 км узоқликда жойлашган. Аввалгиси 414 км узоқликдаги Польша штаби эди.

Фото: Reuters

2025 йил 1 сентябрда Финляндиянинг Миккели шаҳрида НАТО қуруқликдаги қўшинлари қўмондонлигининг янги шимолий штаби иш бошлади. У Финляндия қуруқликдаги қўшинлари штабида жойлашган.

Миккели Россия чегарасидан 140 км узоқликда жойлашган. Бунгача НАТО қуруқликдаги қўшинлари минтақавий қўмондонлигининг Россия чегараларига энг яқин штаби Полшанинг Шецин шаҳридаги Калининграддан 414 км узоқликда жойлашган «Шимолий-Шарқий» кўп миллатли корпуси эди.

Янги қўмондонликнинг вазифалари альянснинг қуруқликдаги кучларини бошқариш ва шимолий минтақадаги миллий қўшинлар ҳаракатларини мувофиқлаштиришдан иборат бўлади. Штаб Атлантика ва Арктика минтақаларини назорат қилувчи НАТО «Норфолк» (АҚШ) қўмондонлиги назорати остида ишлайди. Альянс машғулотларини биргаликда ўтказиш, шунингдек, Финляндия ва НАТО ҳарбий тузилмалари ишида иштирок этиш режалаштирилган.

Россия билан 1340 км узунликдаги чегарага эга Финляндия ўтган йили Россиянинг Украинага кенг кўламли босқинидан сўнг кўп йиллик ҳарбий бетарафликдан воз кечиб, НАТО аъзоси бўлди. Финляндия мудофаа вазири Антти Хакканеннинг таъкидлашича, НАТО штаб-квартирасининг Миккели шаҳрида жойлаштирилиши «Финляндия НАТО тўлақонли аъзоси ва альянс Финляндия мудофаасида жуда муҳим роль ўйнайди» деган ишоранинг Россияга юборилишини англатади.