Пентагон раҳбари Венесуэла президентини ағдариш бўйича операция тайёрлигини билдирди

АҚШ Венесуэлада Николас Мадуро режимини ағдариш тўғрисида қарор қабул қилиши мумкин. Бу ҳақда Fox News эфирида АҚШ мудофаа вазири Пит Ҳегсет маълум қилди ва Оқ уй бу вазифани бажариш учун армиянинг барча ресурсларини ишга солишга тайёрлигини қайд этди.

«Венесуэлада режимнинг эҳтимолий ўзгариши тўғрисидаги қарор президент [Доналд Трамп] даражасида қолади», деб таъкидлади Пентагон раҳбари.

Ҳегсет АҚШ маъмурияти «наркобизнес давлати раҳбари» деб атаган Николас Мадурони ҳокимиятдан четлатишга очиқчасига интилаётганини тасдиқлади. Вазир Вашингтон уни қўлга олишга ёрдам берган маълумот учун 50 миллион доллар мукофот тайинлаганини эслатди ва Венесуэла президентини «Америка халқига бевосита салбий таъсир кўрсатган» гиёҳванд моддалар савдосига алоқадорликда айблади.

2 сентябр куни эрталаб АҚШ ҳарбийлари Кариб денгизининг жанубий қисмида Венесуэладан келаётган ва гиёҳванд моддалар ортилган кемани чўктирди. Доналд Трампнинг таъкидлашича, кема бортида Мадуро манфаатлари йўлида ҳаракат қилувчи «наркотеррорчилар» бўлган. Зарба оқибатида 11 киши ҳалок бўлган.

Ушбу операция кенгроқ ҳарбий кампаниянинг бир қисми бўлди. Август ойи охирида Трамп минтақага наркокартелларга қарши курашиш учун ракета крейсери, учта эсминец, 4,5 минг аскарга эга десант кемалари ва сув ости кемасидан иборат зарба гуруҳини юборишни буюрган эди.

Венесуэла бу қадамларни тажовузкорлик деб баҳолади. Николас Мадуро АҚШнинг ҳарбий иштирокини кучайтиришни «душманлик қамали» деб атади ва БМТ бош котиби Антониу Гутерришга мурожаат қилиб, мамлакат суверенитети ва ҳудудий яхлитлигини ҳимоя қилишга чақирди.

Кема билан боғлиқ воқеадан сўнг Мадуро телемурожаат билан чиқиб, Вашингтон Венесуэланинг табиий бойликларини тортиб олиш учун гиёҳванд моддаларга қарши курашдан ўйлаб топилган баҳона сифатида фойдаланаётганини айтди.