BYD Leopard Titanium 7 сотувга чиқмоқда. Унинг нархи 32 минг доллардан бошланади

Ҳибрид режимда 1300 километрдан ортиқроқ масофа босиб ўта олиши айтилаётган янги йўлтанламаснинг сотувларига 9 сентябрдан старт берилади.

Фото: BYD

BYD Leopard Titanium 7 моделини 4 хил комплектацияда харидорларга бошланғич 230 минг юан (32 минг доллар атрофида) нарх билан таклиф қилади.

Йўлтанламаснинг ўлчамлари шундай: узунлиги 4999 мм, эни 1995 мм, баландлиги эса 1865 мм. Ғилдираклар базаси 2920 ммга тенг. Машина беш кишига мўлжалланган.

Titanium 7 BYD’нинг энг сўнгги ақлли технологиялари билан жиҳозланган. Шунингдек, автомобилнинг топ комплектацияси 25 км/соатгача тезликда учиш ва қўнишни, тўсиқлардан қочишни ҳамда аэрофотосуратга олишни таъминловчи Lingyuan дронларни бошқариш технологиясини қўллаб-қувватлайди.

Тўртала ғилдираклари ҳам “тортадиган” версия 35,6 kWh сиғимли батарея билан жиҳозланган. Бу билан машина токнинг ўзида CLTC цикли бўйича 180 км масофа боиб ўтиши мумкин. Фақат орқа ғилдираклари тортувчи версия эса 26,6 kWh сиғимли батареяга эга, бу унга токнинг ўзида 135 км йўл босиш имконини беради. Ҳибрид режимда эса тўла бензин баки билан 1300 кмдан зиёдроқ масофа босиб ўтиш мумкинлиги ваъда қилинмоқда.