Испанияга келаётган африкалик ноқонуний мигрантлар йўлда жодугарликда айбланиб ўлдирилган - ОАВ

Ғарбий Африка соҳилларидан Канар оролларига йўл олган ноқонуний мигрантлар ҳамроҳлари томонидан жодугарликда айбланиб ўлдирилган. OkDiario нашрига кўра, улар кемада 320 киши бўлиб йўлга чиққан. Оролга эса фақат 248 киши етиб борган.

Фото: EFE

Кема Канар оролларидан 426 км узоқликда ҳалокатга учраган. Daily Mail’нинг ёзишича, Испания қирғоқ қўриқлаш хизмати 251 кишини қутқарган. Сафарга чиққанлардан 70 га яқини ҳалок бўлган, уларни ҳамроҳлари жодугарлик ва сув ўғирлашда айблаб ўлдирган бўлиши мумкинлиги таъкидланмоқда.

Қутқарилган мигрантлар йўловчиларнинг бир қисми сувсизлик ва очликдан ҳалок бўлганини, бошқалари эса сувсизланиш ортидан алаҳсираб ўзини бортдан ташлаганини айтган. Баъзи гувоҳлар қотилликларни ҳам тасдиқлаган. OkDiario манбаларига кўра, бир неча ёш йўловчи бортдагилардан қутулишга қарор қилиб, аввалига уларни майда ўғрилик ёки сув захираларини тугашида айблаган. Бу иш бермагач, уларни жодугарликда айблаб ўлдиришган. Гувоҳларнинг айтишича, баъзиларини отиб ташлашган, бошқаларини эса бортдан улоқтиришган.

Испания полицияси ҳолат юзасидан тергов бошлаган. 2 сентябр куни “мазкур воқеаларга алоқадор” бир неча киши ҳибсга олинган.