«Нима бўлишини кўрасиз» - Трамп Украинадаги уруш туфайли Россия учун оқибатлар ҳақида гапирди

АҚШ президенти Доналд Трамп Россия етакчиси Владимир Путин Украинадаги урушни тўхтатиш бўйича музокараларда ҳамкорликни давом эттирмаса, унинг маъмурияти Москвага қарши чоралар кўриши мумкинлигини тан олди.

Бу ҳақда у 3 сентябр куни Овал кабинетда Полша президенти Карол Навроцки билан икки томонлама учрашувда журналистларга маълум қилди. Унинг нутқидан парчалар Оқ уйнинг Х ижтимоий тармоғидаги расмий аккаунтида эълон қилинди.

«Путин менинг позициямни билади ва у ёки бу тарзда қарор қабул қилади, - деди Трамп. - Унинг қарори қандай бўлишидан қатъи назар, биз ё рози бўламиз, ёки норози бўламиз, агар норози бўлсак, нима бўлишини кўрасиз».

Шу билан бирга, Оқ уй раҳбари россиялик ҳамкасбига аниқ мурожаати йўқлигини тушунтирди.

Мухбирлардан бири Трампдан ўз лавозимига киришганидан буён Россияга нисбатан ҳеч қандай чора кўрмагани ҳақида сўради.

«Сиз Ҳиндистонга қарши иккиламчи санкциялар жорий этилганини [ҳисобга олмаяпсиз]... Бу Россияга юзлаб миллиард долларга тушди. Сиз буни ҳаракатсизлик деб атайсизми? Мен ҳали иккинчи ва учинчи босқични бошлаганим йўқ», деди президент.

Эслатиб ўтамиз, бир кун аввал Трамп Россия раҳбаридан «ҳафсаласи жуда пир бўлганини» яна бир бор таъкидлаган эди. Шу билан бирга, АҚШ президенти Путиндан норозилик айнан нима билан боғлиқлигини тушунтирмади.

Аввалроқ, Трамп Оқ уйдаги брифингда чиқиш қилиб, агар Украина можароси бўйича олдинга силжиш бўлмаса, Вашингтон «бошқа позицияни эгаллаши» мумкинлигини айтди. Президент воқеаларни диққат билан кузатишда давом этаётганини таъкидлади. Унинг сўзларига кўра, у Украинадаги уруш ҳақида «қизиқарли нарсаларни» билиб олган, яқин кунларда уларни баён қилади.