Байден тери саратони бўйича яна бир бор операция қилинди

Оқ уйнинг собиқ раҳбари муолажадан кейин яхши тикланаётгани таъкидланмоқда.

Фото: AP

АҚШ собиқ президенти Жо Байден теридаги саратон ҳужайраларини олиб ташлаш бўйича яна бир операцияни бошдан кечирди. Бу ҳақда NBC News телеканали хабар берди.

Байденнинг вакили сиёсатчи тери саратонининг энг кенг тарқалган шаклларини даволашда қўлланиладиган Мос операциясидан ўтганини айтди. Жо Байденнинг ўзи муолажадан кейин яхши тикланмоқда.

Операциянинг аниқ санаси айтилмаган. Аммо ўтган ойда унинг фотосуратлари эълон қилинди, унда бошидаги катта чок кўриниб турибди.

18 май куни Жо Байденга метастазли простата саратонининг тажовузкор шакли ташхиси қўйилгани маълум бўлди.

АҚШ амалдаги президенти Доналд Трамп бу маълумотнинг ўз вақтида эълон қилинганига шубҳа билдирди, бироқ собиқ ҳамкасбига саломатлик тилади. 2023 йил март ойида Жо Байден теридаги хавфли ўсимтани олиб ташлаш бўйича операция ўтказган эди.