Хитой телевидениеси Си ва Путиннинг «умрбоқийлик» ҳақидаги суҳбати видеосини ўчиришни талаб қилди

Reuters халқаро ахборот агентлиги Хитой раҳбари Си Жинпинг ва Россия президенти Владимир Путин умрни узайтириш имкониятини муҳокама қилгани акс этган тўрт дақиқалик видеони ўчириб ташлашга мажбур бўлди.

Буни ушбу материаллардан фойдаланиш ҳуқуқини бекор қилган Хитой марказий телевидениеси (CCTV) талаб қилди.

Суҳбат Си ва Путин Пекинда Иккинчи жаҳон уруши тугаганининг 80 йиллигига бағишланган парадда кетаётганда ёзиб олинган. Хитой етакчисининг айтишича, «илгари одамлар камдан-кам ҳолларда 70 ёшгача яшаган», ҳозир эса бу ёшда «сен ҳали ҳам ёш боласан». Бунга жавобан Путин келажакда биотехнологияларнинг ривожланиши ва органларни кўчириб ўтказиш инсонни абадийликка яқинлаштириши мумкинлигини айтди. Си «150 ёшгача яшаш имконияти бу асрда ҳам борлигини» таъкидлади.

Reuters Хитой телевидениесидан олинган материаллар асосида роликни монтаж қилиб, бутун дунё бўйлаб минглаб обуначиларга тарқатди. Шундан сўнг, CCTV юридик бўлими агентликни видеодан фойдаланиш шартларини бузганликда айблаган ва ўчириб ташлашни талаб қилган.

Видео ўчириб ташланди, аммо таҳририят эътирозларга рози бўлмади. «Биз эълон қилинган материалларни диққат билан ўргандик ва Reuters’нинг узоқ вақтдан бери аниқ ва холис журналистикага содиқлиги обрўсизлантирилган деб ҳисоблаш учун асос топмадик», деб таъкидлади агентлик.