Зеленский Словакияни Россиядан нефт импортини тўхтатишга чақирди

Украина президенти Володимир Зеленский 5 сентябр, жума куни Словакия бош вазири Роберт Фицо билан «мазмунли» музокаралар ўтказганини айтди. «Бизда бундай мулоқот бўлиши муҳим. Биз уни давом эттирамиз», — деди Зеленский Ужгороддаги учрашувдан сўнг. ОАВ маълумотларига кўра, суҳбатнинг асосий мавзуси Европа Иттифоқининг кенг кўламли санкцияларига қарамай, Москвадан энергия ресурсларини сотиб олишда давом этаётган Словакияга Россия нефтини етказиб бериш бўлган. Венгрия ҳам шундай қилмоқда.

Аввалроқ АҚШ президенти Доналд Трамп европаликларни Вашингтонга қўяётган талаблари фонида икки томонлама стандартларда айблаган эди. Хитой ва Ҳиндистон Россия энергетика ресурсларининг асосий харидорлари бўлиб қолмоқда ва Европа Иттифоқи Қўшма Штатлардан бу давлатларга босимни кучайтиришни сўрамоқда. Шу билан бирга, Европа Иттифоқининг ўзи ҳали Пекин ва Деҳлига қарши кенг қамровли иккиламчи санкцияларни қўлламаган. Трампнинг таъкидлашича, европаликлар Қўшма Штатлардан Россия нефти ва гази харидорларига нисбатан санкциялар жорий этишни талаб қилмоқда, Европа Иттифоқи давлатлари – Словакия ва Венгрия эса Москвадан қазиб олинадиган ёнилғини сотиб олишда давом этмоқда.

Зеленский билан музокарадан сўнг Роберт Фицо Украинага хавфсизлик кафолатлари тезроқ берилишига ва Россия билан можарода адолатли тинчликка эришишга умид қилишини айтди.

Унинг сўзларига кўра, Украина ва Словакия ўртасидаги муносабатлар келишмовчиликларга қарамай мустаҳкамлигича қолмоқда. Шу билан бирга, Фицо Украинанинг Россия энергетика инфратузилмаси объектларига ҳужумлари Словакиянинг ўзига ҳам зарар етказаётганини таъкидлади.