Украинадаги ҳарбий можарода 92 нафар АҚШ фуқароси ҳалок бўлди – ОАВ

Украина армиясига қўшилган америкаликлар сони «бир мингдан бир неча минггача» бўлиши мумкинлиги таъкидланмоқда.

Фото: The New York Times

Украина ҳудудидаги ҳарбий можаро чоғида Украина томонида жанговар ҳаракатларда қатнашган 92 нафар АҚШ фуқароси ҳалок бўлди. Бу ҳақда The New York Times Украина тарихи музейи маълумотларига таяниб хабар берди. Нашрнинг таъкидлашича, Украина армиясига жами «бир мингдан бир неча минггача» америкалик қўшилган бўлиши мумкин.

NYT маълумотларига кўра, урушда қатнашган америкаликлар орасида асосан истеъфодаги ҳарбийлар бўлиб, улар украиналик ҳарбийлар билан тенг хизмат қилган ва бир хил тўлов олган: ойига тахминан 1 минг доллар асосий маош ва 3 минг долларгача жанговар устамалар.

Украина армиясига АҚШ фуқароларининг асосий оқими 2022 йилдаги можаронинг дастлабки ойларида кузатилган. Газетанинг таъкидлашича, можарога Украина томонида қўшилган америкаликлар орасида нафақат собиқ ҳарбийлар, балки тинч аҳоли вакиллари, шунингдек, аёллар, жумладан, тиббиёт ходимлари ҳам бор.

Украина Мудофаа вазирлиги урушда қатнашган америкалик ҳарбийлар ҳақида ҳеч қачон маълумот бермаган.