Германия ва Франция Марказий Осиёдаги банкларга нисбатан санкцияларни кучайтиришга чақирди

Санкциялар рўйхатига Россия нефтини Европа Иттифоқига экспорт қилувчи нефтни қайта ишлаш заводлари ва у билан ишлайдиган савдо компаниялари киритилиши мумкин.

Фото: РИА Новости / Алексей Витвицкий

Германия ва Франция Европа Иттифоқининг янги, 19-санкция пакети доирасида Россиянинг "Лукойл" нефт компанияси ва унинг Litasco шуъба корхонасига қарши санкциялар киритишни таклиф қилди. Бу ҳақда дипломатларга таяниб, AFP агентлиги хабар берди.

Агентлик манбаларига кўра, бу таклиф Европа комиссиясига ўтган ҳафтада киритилган. Санкциялар рўйхатига Россия нефтини Европа Иттифоқига экспорт қилиш билан шуғулланувчи учинчи мамлакатлардаги нефтни қайта ишлаш заводлари ва Россия нефти билан ишлайдиган савдо компанияларини киритиш тавсия этилади. Бундан ташқари, Германия ва Франция Марказий Осиёдаги банклар ва криптовалюта биржаларига нисбатан санкцияларни кучайтиришга чақирди.

Dpa агентлиги томонидан кўриб чиқилган ҳужжатда айтилишича, нефт ва газ сотиш Россиянинг Украинага қарши урушини молиялаштиришнинг асосий манбаи ҳисобланади.