Мирзиёев, Жапаров ва Раҳмон Толстой номидаги Халқаро тинчлик мукофоти билан тақдирланди

Ўзбекистон, Қирғизистон ва Тожикистон президентлари Шавкат Мирзиёев, Садир Жапаров ва Эмомали Раҳмон Лев Толстой номидаги Халқаро тинчлик мукофоти билан тақдирланди. Бу ҳақда ҳакамлар ҳайъати раиси, Россия Федерацияси халқ артисти, Болшой ва Мариинский театрлари бадиий раҳбари Валерий Гергиев маълум қилди.

Гергиевнинг сўзларига кўра, ҳакамлар ҳайъати бир овоздан ушбу номзодларга овоз берган.

Ташкилий қўмитанинг таъкидлашича, уч мамлакат етакчилари Марказий Осиё минтақасида тинчлик ва хавфсизликни мустаҳкамлашга қўшган улкан шахсий ҳиссалари учун ушбу мукофотга лойиқ деб топилди.

Толстой мукофоти Россия Тарих жамияти ва Россия Тинчлик фонди томонидан таъсис этилган бўлиб, у тинчликни мустаҳкамлашга қўшган улкан хизматлари учун берилади.

Ушбу мукофот ҳайъати Аргентина, Беларус, Ҳиндистон, Хитой, Россия, Франция, ЖАР ва Япония мамлакатларининг сиёсий ва жамоат арбобларидан ташкил топган.