Арманистон президенти унинг мамлакати энди Россиянинг “укаси” эмаслигини айтди

Ваагн Хачатуряннинг сўзларига кўра, Ереван "россиялик ҳамкасблар Арманистон ҳукуматининг мустақил қарорларини инобатга олишини" хоҳлайди.

Фото: ТАСС

Арманистон президенти Ваагн Хачатурян эндиликда Россия-Арманистон муносабатлари ўзаро ҳамкорлик асосида давом этаётганини билдирди.

"Ҳозир Россия билан алоқаларимиз бутунлай бошқача – ҳамкорлик алоқаси. Энди Россия Арманистонга ака укага қарагандек муносабатда эмас, балки шунчаки ҳамкорлик. Охирги тўрт йилда кўп нарсага эришдик", - деди Ваагн Хачатурян.

Арманистон президентининг сўзларига кўра, Ереван "россиялик ҳамкасблар Арманистон ҳукуматининг мустақил қарорларини инобатга олишини" хоҳлайди.

У шунингдек, Россия бош вазири ўринбосари Алексей Оверчукнинг Арманистон Евросиё иқтисодий иттифоқи (ЕОИИ) ёки Евроиттифоқдан бирини танлаши кераклиги ҳақидаги сўзларига ҳам изоҳ берди.

"Бу нимани англатишини Оверчукдан сўраш керак. Биз ЕОИИ шартлари бўйича иш юритяпмиз. Евроиттифоқ билан иқтисодий маънодаги шартлар бўйича иш олиб боряпмиз. Ҳарҳолда, шу пайтгача ҳеч қандай муаммо келиб чиқмаган", - деди у.

Тайёрлаган: Kun.uz Admin

#Арманистон #Россия