АҚШ Трамп президентлиги даврида Украинага биринчи ҳарбий ёрдам пакетини маъқуллади

Ҳарбий таъминот АҚШнинг НАТО бўйича иттифоқчилари маблағлари ҳисобига амалга оширилади.

Фото: Reuters

АҚШ президенти Доналд Трамп маъмурияти НАТО иттифоқчилари билан биргаликда ишлаб чиқилган янги молиялаштириш механизми доирасида Украинага биринчи ҳарбий ёрдам таъминотини маъқуллади. Reuters манбаларига кўра, яқин вақт ичида 500 млн долларлик ёрдам юборилиши мумкин.

Таъминот тўғрисидаги қарор Priority Ukraine Requirements List (PURL) ташаббуси доирасида Мудофаа вазирининг сиёсий масалалар бўйича ўринбосари Элбриж Колби томонидан тасдиқланган. Ушбу механизм АҚШнинг НАТО бўйича иттифоқчилари маблағлари ҳисобидан Украина учун Америка қуролларини сотиб олишни молиялаштиришни назарда тутади.

PURL дастури Украинага қурол-яроғга бўлган устувор эҳтиёжлар рўйхатини шакллантириш имконини беради, кейин у алянсга топширилади. Ҳамкор давлатлар маблағларни махсус ҳисоб рақамига ўтказади, шундан сўнг тўғридан-тўғри АҚШдан қурол сотиб олинади. Reuters нашрига кўра, бу Трамп Оқ уйга қайтганидан кейин унинг маъмурияти томонидан маъқулланган Украинага биринчи ҳарбий таъминотдир.

АҚШ молия вазири Скотт Бессент сўзларига кўра, Вашингтон Европага Киев учун мўлжалланган қуролларни 10 фоиз устама билан сотмоқда, бу эса Украина учун келажакдаги хавфсизлик кафолатлари доирасида ҳаво ҳужумидан ҳимоя қилиш харажатларини қоплаш имконини беради. Украина президенти Володимир Зеленский аввалроқ PURL дастури доирасида Европа давлатларининг ҳар ойлик 1 миллиард долларлик бадалларидан умид қилаётганини айтган эди.

15 сентябр ҳолатига кўра, Зеленский сўзларига биноан, ушбу схема орқали 2 миллиард доллардан ортиқ маблағ жалб қилинган. Ташаббус иштирокчилари орасида Нидерландия, Дания, Швеция, Германия, Белгия ва НАТОнинг бошқа давлатлари бор.