Хорижда иш ваъдаси: одамларни чув туширган учта фирма мансабдорларига жиноий иш қўзғатилди

Тошкент шаҳридаги 3 та МЧЖ – “Best info consult”, “Sta cons” ва “Biletol” мансабдорларига нисбатан жиноят иши қўзғатилди.

Kun.uz танишган айблов хулосасида келтирилишича, 1993 йилда туғилган М.Р. ҳамда 1986 йилда туғилган Ш.К. ўзгалар мулкини қўлга киритиш мақсадида жиноий тил бириктирган. Улар 2024 йил “Best info consult”, 2023 йил “Biletol” ҳамда “Sta cons” МЧЖларни давлат рўйхатидан ўтказиб, раҳбарлик қилиб келишган.

Ушбу МЧЖлар томонидан ижтимоий тармоқларда хорижий давлатларга ишга юбориш ҳақида эълонлар жойлаштирилган. Мурожаат қилган фуқаролар билан шартномалар расмийлаштириш орқали уларнинг ишончига кирилган. Сўнгра турли ташкилий ишлар баҳонасида фуқаролардан пул маблағлари ундирилган. Бироқ ушбу пуллар жамият ҳисоб рақамига кирим қилинмасдан, шахсий эҳтиёжларга сарфланган. Хорижга ишга жўнатиш ваъдаси эса бажарилмаган.

Жумладан, М.Р. 2024 йил феврал ойида фуқаро И.А. билан 1,5 минг доллар эвазига уни Литва давлатига ишга жўнатишни ваъда қилиб, шартнома имзолаган. Сўнгра фуқародан 11 млн 200 минг сўм пул олиб, шартнома шартларини бажармаган.

М.Р. ва Ш.К. шу каби режа билан 34 нафар фуқаронинг жами 817 млн сўм пулини қўлга киритган. Аммо на уларни ишга жўнатган, на пулини қайтариб берган. Улар фирибгарликда гумонланиб, 2025 йил апрел ойида қўлга олинган ҳамда қамоқ эҳтиёт чораси қўлланган.

Ҳозирда тергов ҳаракатлари тугатилиб, иш мазмунан кўриб чиқиш учун судга жўнатилган.

Олдинроқ АҚШга ишга жўнатишни ваъда қилган “American Adventure” фирмаси вакиллари фирибгарликда айбланаётгани хабар қилинганди.