Пентагон «Олтин гумбаз» ракетага қарши мудофаа тизимини ишлаб чиқди

Тизим аэродинамик ва баллистик таҳдидларнинг бутун спектрига қарши курашиш учун мўлжалланган.

Фото: Reuters

«Олтин гумбаз» ракетага қарши мудофаа тизимини яратиш дастури учун масъул бўлган АҚШ космик кучлари генерали Майкл Гетлайн лойиҳани ишлаб чиқишни якунлади. Пентагон унинг кўлами ва қиймати ҳақида батафсил маълумот бермади.

«Ҳозир дастур кўриб чиқилмоқда ва ҳеч қандай қўшимча маълумот йўқ, тезкор хавфсизлик устувор бўлиб қолмоқда», дейилади Пентагон баёнотида.

АҚШ президенти Доналд Трамп май ойида «Олтин гумбаз»ни яратиш 175 миллиард долларга тушиши мумкинлигини айтган эди. Конгресснинг бюджет бошқармаси космик тутқичлар тармоғининг ўзи 542 миллиард долларга тушади, деб ҳисобламоқда. 25 миллиард долларлик транш аллақачон Конгрессда кўриб чиқилмоқда.

Доналд Трамп 2025 йил 28 январда «Олтин гумбаз»ни яратиш тўғрисидаги фармонни имзолади. АҚШ ҳукумати тизим аэродинамик ва баллистик таҳдидларнинг бутун спектрига қарши курашиш учун мўлжалланганини маълум қилди. Reuters нашрига кўра, унга радиолокацион панжаралар, ердаги тутқичлар, космик зондлар ва лазер тизимлари кириши мумкин.

Тайёрлаган: Сардор Юсупов

#АҚШ #Пентагон #Олтин гумбаз