“Мирзиёев билан Ўзбекистоннинг кредит рейтингини яхшилашни гаплашдим” - АҚШнинг 3-энг йирик банки раиси 

Шавкат Мирзиёев АҚШга сафари чоғида 22 сентябрь куни давомида бу давлатдаги ишбилармонлар, нуфузли молия ташкилотлари раҳбарлари ва инвесторлар билан учрашди. Бир неча соат ичида президент 16 нафар шундай банкир, молиячи, иқтисодчи ва халқаро ташкилотлар раҳбарларини қабул қилди. 

«Citigroup» АҚШнинг энг йирик молиявий корпорацияларидан ҳамда давлатдаги 3-энг йирик банк ҳам ҳисобланади. Унинг раиси Жон Дуган бир неча бор Мирзиёев билан кўришган. «Citigroup» Ўзбекистонда ҳам ваколатхона очган, Тошкент асосий молиявий ишларини бу корпорацияга ишониб ҳам топширмоқда. 

Kun.uz билан гаплашган Жон Дуганга кўра, у президент билан кўплаб мавзулар қатори - Ўзбекистоннинг кредит рейтингини оширишни ҳам гаплашган.

“Хабарингиз бор, биз Ўзбекистонда ваколатхона очиш орқали мамлакатдаги иштирокимизни кенгайтиришга жуда иштиёқманд эдик. Президент бу борада катта ёрдам берди ва ниҳоят, шу ёзда ваколатхонамизни очдик. У ердаги иштирокимиз кенгайганидан мамнунмиз.

Сўнгра биз мамлакатнинг кредит рейтингини яхшилашга ёрдам беришда ҳам иштирок этдик. У икки поғонага кўтарилди ва унинг яна бир поғона кўтарилиб, инвестицион даражага етишини интиқлик билан кутяпмиз ва бунга умидимиз катта. Агар мамлакат бунга эриша олса, бу ҳақиқий ютуқ бўлади. Булар иккита нарса. Учинчидан, биз мамлакат учун қарз мажбуриятларини чиқаришда фаол иштирок этдик ва бу жараёнга раҳбарлик қилдик. Бу биз учун ажойиб топшириқ бўлди. Натижа Ўзбекистон учун аъло бўлди, деб ўйлаймиз”,-дейди Дуган. 

Сиз Ўзбекистонда ўз ваколатхонангизни очдингиз. Бу сиз учун нимани англатади?

“Бу бизнинг яқинроқ эканимизни англатади. Биз деярли 100 та мамлакатда бевосита фаолият юритамиз ва бу иштирокни оқлайдиган даражада бизнес мавжуд бўлганда, жисмоний ваколатхонага эга бўлиш жуда муҳим. Бу бизнинг бизнесни жуда амалий тарзда юритиш усулимиз бўлиб, дунёдаги ҳеч бир банк глобал иштирок ва қамровимизга тенг кела олмайди. Шундай экан, у ерда бўлиш нафақат бизнинг фаолиятимиз кўрсаткичи, балки Ўзбекистон ўз иқтисодиётини дунёга очишда қанчалик муҳим ва муваффақиятли бўлганининг ҳам белгисидир”.

Ўзбекистонда бирор хавф-хатарни кўряпсизми?

“Хатарлар доим бор. Шу сабабли биз кредит муҳитини диққат билан кузатиб борамиз ва, албатта, геосиёсий вазият ҳам бор. Буларнинг барчаси биз эътибор қаратишимиз керак бўлган нарсалардир”.

Жаноб Дуган, бу Kun.uz - Ўзбекистондаги энг катта медиалардан бири. Сиз президент билан кўришдингиз, у нималар деди? «Citigroup» яқин келажакда Ўзбекистон билан нималар қилади?

“Президент билан бўлиб ўтган учрашувда биз мамлакатнинг кредит рейтингини яхшилаш бўйича гаплашдик. Молиявий корпорациямиз маслаҳат бериш, қарз мажбуриятларини чиқаришни давом эттириш ва шунингдек, хусусийлаштириш билан боғлиқ акцияларни, қимматли қоғозларни чиқаришда иштирок этиш бўйича ишларни давом эттиришини кўриб чиқдик. Буларнинг барчасини президент айтиб ўтди ва биз ушбу ташаббуслар бўйича ҳукумат билан ишлаётганимиздан мамнунмиз”.

Сўзи охирида Дуган Ўзбекистон билан мулоқотдан унинг корпорацияси манфаатдор эканини ҳам айтди.