Москвадаги «Садовод» бозорида ўзбек компаниялари учун савдо нуқталари ва омборхоналар ижарага олинди

Москва шаҳридаги «Садовод» савдо мажмуасида савдо нуқталари ва омборхоналар ижарага олинди ва ўзбек компанияларига бепул тақдим этилмоқда. Бу ҳақда Инвестициялар, саноат ва савдо вазирлиги маълум қилди. 

Хабарда айтилишича, мажмуадаги бевосита савдо жараёнидан ташқари, экспортёрлар Россиянинг Wildberries, Ozon, Яндекс.Маркет каби йирик онлайн-платформаларига ва бошқа сайтларига чиқиш ҳамда бутун мамлакат бўйлаб мижозларни қамраб олиш имкониятига эга бўлади.

«Садовод» бозори Москва жануби-шарқий маъмурий округида жойлашган бўлиб, 1990-йиллар бошида очилган. У 40 гектардан зиёд майдонни эгаллаган. 

Маълумотларга кўра, бозорга кунига 100 мингдан ортиқ харидор келади. Тадбиркорлар Зарах Илиев ва Год Нисановлар мазкур бозор эгаси ҳисобланади.