Қўшимча функционаллар
-
Тунги кўриниш
АҚШ: Украинада Россия томонида 5000 га яқин кубалик жанг қилмоқда
Доналд Трамп маъмурияти БМТнинг Кубага қарши савдо эмбаргосини бекор қилувчи резолюциясини блоклашга уринмоқда. АҚШ маълумотларига кўра, Ҳавана Украинага қарши урушда Россияни қўллаб-қувватламоқда.
АҚШ расмийлари ўз дипломатларига иттифоқчиларни Бирлашган Миллатлар Ташкилоти (БМТ)нинг Кубага нисбатан узоқ йиллик савдо эмбаргосини бекор қилишга қаратилган резолюциясига қарши овоз беришга чақиришни буюрди. Бундай қарорга қарши далил сифатида АҚШ минглаб кубаликлар Украинага қарши урушда рус қўшинлари билан бирга жанг қилаётганини кўрсатадиган ўз маълумотларини келтирмоқда. Бу ҳақда 6 октябр, душанба куни Reuters агентлиги АҚШ Давлат департаментининг 2 октябрдаги ички хабарига таяниб хабар берди.
«Шимолий Кореядан кейин Куба Россия агрессияси учун хорижий қўшинларнинг энг йирик етказиб берувчиси ҳисобланади: Украинада тахминан 1000-5000 кубалик жанг қилмоқда», дейилади телеграммада. Давлат департаменти Reuters агентлигига кубалик ёлланма аскарлар ҳақида маълумот беришдан бош тортди, бироқ унинг вакили таъкидлашича, орол ҳукумати «ўз фуқароларини Россия-Украина урушида пиёда сифатида фойдаланишдан ҳимоя қила олмаган».
Reuters хабарига кўра, сўнгги ҳафталарда Украина расмийлари америкалик қонун чиқарувчиларни Россиянинг Украинада жанг қилиш учун кубалик аскарларни ёллаш кўлами ошиб бораётгани ҳақида огоҳлантирган.
Бундан ташқари, Ҳаванага қарши 20 га яқин айбловларни ўз ичига олган ҳужжатда БМТ резолюциясида Куба муаммоларида Вашингтонни «ноўрин» айблаши ва бу муаммога мамлакат расмийларининг «коррупция ва малакасизлиги» сабаб бўлгани таъкидланган. Трамп маъмурияти АҚШнинг дунё бўйлаб ўнлаб ваколатхоналарига телеграмма юборди, деб хабар бермоқда Reuters.
АҚШнинг Кубага қарши эмбаргосини бекор қилишга чақирувчи резолюция БМТ Бош ассамблеяси томонидан 1992 йилдан бери ҳар йили мутлақ кўпчилик овоз билан қабул қилинади. 2024 йилда 187 давлат уни қўллаб-қувватлади, фақат АҚШ ва Исроил қарши чиқди, Молдова эса бетараф қолди.
Қарор қонуний кучга эга эмас. Овоз беришдан мақсад Вашингтонга халқаро сиёсий босимни намойиш этиш. Ҳаванага қарши савдо эмбаргосини фақат АҚШ Конгресси бекор қилиши мумкин. 2025 йил январида президентликка келганидан бери Доналд Трамп Кубага босимни кучайтирди ва уни терроризм ҳомийси бўлган давлатлар рўйхатига қайтарди.
