Оқ уй Трампга Нобел мукофоти берилмаганини «сиёсатни тинчликдан устун қўйиш» деб баҳолади — ОАВ

Тинчлик бўйича Нобел мукофоти венесуэлалик мухолифатчи аёлга берилди. Трамп ушбу мукофотга очиқчасига интилган, тинчликпарварлик ҳаракатлари ҳақида кўп гапирган ва агар мукофотни олмаса, «АҚШ учун катта ҳақорат» бўлишини айтган эди.

Фото: The Washington Post

АҚШ президенти Доналд Трамп маъмурияти Нобел қўмитаси венесуэлалик мухолифатчи Мария Корина Мачадога тинчлик мукофотини бериш орқали «сиёсатни тинчликдан устун қўйганини» айтди, деб ёзди The Washington Post.

Коммуникациялар бўйича директор Стивен Чунг сўзларига кўра, президент Трамп тинчлик шартномалари тузишда, урушларни тўхтатишда ва одамлар ҳаётини сақлаб қолишда давом этади. Баёнотда Нобел мукофоти ғолиби ҳам, Қўшма Штатлар томонидан режалаштирилган жавоб ҳам тилга олинмаган.

Нашрнинг таъкидлашича, Трамп тинчлик бўйича Нобел мукофотига очиқчасига интилган, тинчликпарварлик ҳаракатлари ҳақида кўп гапирган ва агар мукофотни олмаса, «мамлакат учун катта ҳақорат» бўлишини айтган. 9 октябр куни Исроил ва ҲАМАС Трамп томонидан келишувга қатъий чақирилганидан кейин ўт очишни тўхтатиш бўйича дастлабки келишувга эришди.

The Washington Post нашрининг ёзишича, лауреатнинг эълон қилиниши ва унинг Норвегия учун эҳтимолий оқибатлари Норвегия оммавий ахборот воситаларининг асосий мавзусига айланган. NRK миллий телерадиокомпанияси АҚШ Норвегияни жазолаш-жазоламаслигини муҳокама қилди, ТВ2 телеканали эса мукофотнинг бошқа одамга берилиши «Трампга нисбатан ҳақорат» сифатида қабул қилиниши мумкинлигини таъкидлади. Осло университети сиёсатшунослик профессори Бенедикт Буллнинг айтишича, бу йил Норвегияда «қўрқув кайфияти» ҳукм сурмоқда, мукофотнинг бошқа одамга берилиши АҚШ президенти томонидан санкцияларнинг қўлланишига олиб келиши мумкин.

Баъзи норвегиялик қонун чиқарувчилар ва собиқ дипломатлар мукофот эълон қилинишидан олдин ҳам хавотир билдирган эди. Социалистик сўл партия етакчиси Кристи Бергстё Трамп қўмитанинг ҳукуматдан мустақиллигини билишига ишончи комил эмаслигини айтди. Собиқ ташқи ишлар вазири Ян Петерсен Норвегия расмийлари АҚШ реакциясига тайёр бўлиши кераклигини таъкидлади.

Норвегия аввал ҳам Нобел қўмитаси қарорлари туфайли салбий муносабатларга дуч келган - 2010 йилда хитойлик диссидент Лю Сяобога мукофот берилгандан кейин Хитой ушбу давлат билан бир неча йилга дипломатик алоқаларни узди. Норвегия расмийлари қўмита қарорларни мустақил қабул қилишини таъкидламоқда, ОАВ эса лауреат Ғазода ўт очишни тўхтатиш эълон қилинишидан олдин ҳам танлангани ҳақида хабар берди.