ФИФАда можаро: ташкилот америкалик футболчининг дисквалификациясини тўхтатди

АҚШ миллий жамоаси ҳужумчиси Фоларин Балогун жаҳон чемпионати 1/8 финал босқичида Белгияга қарши ўйинни ўтказиб юбориши керак эди – у жамоасининг олдинги ўйинида қизил карточка олганди. Аммо ФИФА ушбу футболчининг дисквалификациясини бир йиллик синов муддати билан тўхтатиб турадиган бўлди. Қўшма Штатлар президенти Доналд Трамп бу қарор учун ташкилотни мақтади ва миннатдорчилик билдирди.

Нималар маълум?

25 ёшли ҳужумчи 1/16 финалда Босния ва Ҳерцеговина дарвозасига гол уриб, ҳисобни очган, аммо иккинчи бўлим давомида рақиб ҳимоячиси Тарик Мухаремович билан тўқнашганди – америкалик футболчи рақиб оёғининг тўпиқ қисмига зарба бериб юборганди. Аввалига бош ҳакам Рафаэл Клаус эпизодни эътиборсиз қолдирган, аммо VAR аралашувидан кейин Фоларинга «жиддий қоидабузарлик» учун қизил карточка кўрсатганди.

ФИФА турнири регламентининг 10.5-моддасига кўра, тўғридан тўғри қизил карточка автоматик равишда бир ўйинга дисквалификацияга сабаб бўлади. Бундан ташқари, футболчига қўшимча санкциялар қўлланиши ҳам мумкин эди (масалан, шу турнирда Канада яримҳимоячиси Исмоил Коненинг оёғини синдириб юборган қатарлик ҳимоячи Ассим Мадибога кейинчалик 5 ўйинлик дисквалификация қўлланди).

Балогун билан боғлиқ вазиятда эса ФИФА интизомий кодекснинг 27-моддасини ишга туширган, унга кўра «суд органи чораларни қўллашни тўлиқ ёки қисман тўхтатиб туриш тўғрисида қарор қабул қилиши мумкин».

«АҚШ миллий жамоаси футболчиси Фоларин Балогуннинг дисквалификацияси бир йиллик синов муддатига тўхтатилади», – дейилган ФИФАнинг 5 июл кунги баёнотида.

Низомга кўра, бир йил ичида футболчи интизомий қоидабузарлик содир этадиган бўлса, дисквалификация автоматик тарзда тикланади ва қўшимча жазо ҳам қўлланиши мумкин.

«ФИФА бу моддани жуда кам ҳолатларда қўллайди. Санкцияни тўхтатиб туриш тўғрисидаги қарор ишнинг аниқ ҳолатларини ҳисобга олган ҳолда, қоидабузарлик жуда жиддий бўлмаса ва интизомий қўмита футболчини четлатиш зарур эмас деган хулосага келганда қабул қилинади. Ушбу ҳолатда қарор якуний ҳисобланади», – деган «СЭ» нашри спорт ҳуқуқшуноси Юрий Зайцев..

Энди Балогун расман бугун тунда 1/8 финал доирасида Белгияга қарши кечадиган ўйинда майдонга тушиши мумкин. Табиийки, америкаликларнинг рақиби бу қарордан норози бўлишди.

«Белгия қироллиги футбол ассоциацияси (RBFA) ФИФА қароридан ҳайратда [...] Барча иштирокчи жамоаларнинг қонуний ҳуқуқларини ҳимоя қилиш ва ушбу жаҳон чемпионатида ҳам, келгусидаги турнирларда ҳам спортимизда ҳалол ўйиннинг асосий тамойилларини сақлаб қолиш учун RBFA кейинги ҳаракатларнинг барча эҳтимолий вариантларини ўрганиб чиқмоқда», – дейилади баёнотда.

Вашингтондан қўнғироқ

Британиялик нуфузли журналист Бен Жейкобснинг хабар беришича, Балогуннинг дисквалификацияси Оқ уйдан бўлган қўнғироқдан кейин тўхтатилган. Унинг маълумотига кўра, АҚШ маъмурияти қарор қайта кўриб чиқилишини сўраб, тўғридан тўғри ФИФА президенти Жанни Инфантинога мурожаат қилган. Аммо федерациядагилар Вашингтоннинг иштирокини рад этишди ва мустақил интизомий қўмита шундай хулоса чиқарганини билдиришди.

Футболчига нисбатан санкция бекор бўлгани ҳақидаги хабар ортидан АҚШ президенти Доналд Трамп ижтимоий тармоқда қисқача хабар қолдирди.

«Тўғри қарор учун ФИФАга раҳмат. Катта адолатсизлик тузатилди!» – дея ёзган Қўшма Штатлар раҳбари.

АҚШ футбол федерацияси ҳам дисквалификация тўхтатилганини олқишлаган. «Биз интизомий қўмита қарорини қабул қиламиз ва Балогуннинг эртага ўйнаш ҳуқуқига эга эканидан хурсандмиз», – дея U.S. Soccer баёнотидан иқтибос келтиради Жейкобс.

АҚШдагилар қизилга норозилик билдирганди

Дисквалификация бекор қилиниши Қўшма Штатлар жамоаси учун катта ютуқ бўлди. Балогун – жамоанинг асосий юлдузларидан бири ҳисобланади. Ушбу ҳужумчи жаҳон чемпионатидаги деярли барча ўйинларда бошланғич таркибдан ўрин олганди (гуруҳ босқичининг сўнгги турида натижаси аҳамиятсиз бўлган Туркияга қарши ўйин бундан мустасно), Парагвай билан ўйинда дубл қайд этган, Австралия билан ўйинда голли пас берган, Босния ва Ҳерцеговинага қарши ўйинда четлатилишидан олдин ҳисобни очишга улгурганди.

Балогуннинг қизил карточкасига ўша вақтдаёқ Америка томонидан жиддий эътирозлар билдирилганди. Ўйиндан кейин нафақат мухлислар ва бош мураббий Маурисио Почеттино, балки АҚШ давлат котиби Марко Рубио ҳам ўз норозилигини билдириб, америкаликлар жамоаси ўйинида «ноҳақ ҳакамлик» қилинганини айтганди.

Футболчи ҳам ўз ҳаракати қизил карточкага лойиқ бўлмаганини айтиб чиққанди. «Оёғимни қўйишга жой йўқ эди, шунинг учун бундай контакт бўлиши муқаррар эди. Мен кўплаб турли хил фикрлар ва нуқтайи назарларни кўрдим, лекин шахсан мен сариқ карточка билан чекланиш тўғри қарор бўларди, деб ҳисоблайман», – дея Балогуннинг сўзларини келтирган ESPN.

Бундан ташқари, маҳаллий нашрлар гуруҳ босқичида Жазоирга қарши ўйинда Аргентина миллий жамоаси сардори Лионел Мессига худди шу каби қўполлик учун сариқ карточка кўрсатилмаганига ҳам эътибор қаратишди. Энди ушбу футболчилар бир хил ҳолатда. Америкалик футболчининг дисквалификацияси тўхтатилди.