Фото: Қарийб икки минг фаластинлик маҳбус озод қилинди

13 октябрь куни АҚШ воситачилигида тузилган сулҳ доирасида озод қилинган фаластинлик маҳбусларни қарши олиш учун Ғарбий соҳил ва Ғазода тўпланган одамларга тўлди. Улар автобусларга ёпирилиб, ўзининг қариндошларини кўз ёшлар билан кутиб олди.

Reutersʼнинг ёзишича, келишувга кўра Исроил «оғир жиноятлар»да айбланган 250 нафар фаластинликни, уруш бошланганидан бери Ғазода ҳибсга олинган 1 700 нафар фаластинликни, 22 нафар вояга етмаганларни озод қилган. Бундан ташқари Ҳамас аскарларидан 360 кишининг жасади ҳам қайтариб берилган.

Исроил ҳукумати 1 968 нафар фаластинлик маҳбусни озод этиш жараёни тўлиқ якунланганини билдирди. Исроил қамоқхона хизмати расмий баёнотда айтилишича, маҳбуслар Ғарбий соҳил, Шарқий Қуддус ва Ғазо секторига жўнатилган.

Ғазо сектори жанубидаги Хон Юнус шаҳрида минглаб одамлар тўпланди, кимдир Фаластин байроғини ҳилпиратди, кимдир эса ўз яқинининг суратини кўтарди, деб ёзади нашр.

Озод этилган маҳбуслар автобусларда келди – айримлари ойнадан бош чиқариб, «ғалаба» ишорасини кўрсатишди.

Бундан аввалроқ, Ҳамаснинг қуролли қанотига мансуб қора ниқобли аскарлардан иборат гуруҳ касалхонага келган, у ерда озод этилган фаластинликларни кутиб олиш учун саҳна ва ўриндиқлар тайёрланганди.

Озод қилинганлар орасида Ҳамаснинг йирик қўмондонлари ёки бошқа фракцияларнинг таниқли етакчилари йўқ. Бу эса айрим маҳбуслар қариндошлари орасида «битим етарлича кенг эмас» деган норозиликни келтириб чиқарди.

154 маҳбус Мисрга депортация қилинди

Фаластин Маҳбуслари бўйича медиа идорасига таяниб, Al-Jazeera'нинг маълум қилишича, душанба куни озод этилган камида 154 нафар фаластинлик маҳбус Исроил томонидан сургун қилинади. Ҳамасга кўра, 154 нафар маҳбус Мисрга депортация қилинган.

Кузатувчиларнинг таъкидлашича, бундай мажбурий сургун озод этилганларнинг фуқаролик ҳуқуқларини бузади ва алмашув битимлари атрофидаги иккиюзламачиликни кўрсатади.

«Бу, шубҳасиз, ноқонуний», — деди Доха олий тадқиқотлар институти жамоат сиёсати бўйича доценти Тамер Қармут Al-Jazeera'га берган интервьюсида.

«Бу ноқонуний, чунки улар Фаластин фуқаролари, бошқа фуқароликка эга эмас. Улар кичик қамоқхонадан чиқишяпти, аммо каттароқ қамоқхонага — ўз жамиятидан узоқ, бегона давлатларга жўнатилишяпти. У ерда улар катта чекловларга дуч келади. Бу инсонийликка зид», — деди у.

«Энди айрим оилалар ўз яқинларининг Фаластиндан сургун қилинишини кўради, лекин уларни учратишнинг имкони бўлмайди», — деди нашрнинг Ғарбий соҳилда ишлаётган мухбири Нида Иброҳим.

Таҳлилчи Тамер Қармутга кўра, сургун уларнинг сиёсий келажагини тугатади.

«Улар борадиган мамлакатларда жуда қатъий чекловларга дуч келади, бу эса уларнинг ҳар қандай сиёсий ёки ижтимоий фаолиятини тўхтатади,» — деди у. Унинг фикрича, бу депортациялар аслида озод этилган маҳбусларни мажбуран кўчириш ва уларнинг оилаларига нисбатан жамоавий жазо ҳисобланади — оилалар энди сургундаги яқинларидан ажралади ёки агар Исроил рухсат этса, ўз юртини тарк этишга мажбур бўлади.