Ҳозирча танишув. Каннаваронинг дебюти қандай ўтди?

Италиялик мураббий Фабио Каннаваро бошчилигида Ўзбекистон миллий жамоаси иккита учрашув ўтказди. Битта кучсизроқ, битта кучли жамоага қарши ўйинлардан кейин баъзи хулосалар қилиш мумкин. Қуйида Каннаваро мураббийлигидаги миллий жамоа қандай ўйин кўрсатгани, қайси жиҳатларга эътибор қаратиш зарурлиги ҳақида.

{Yii::t(}

Ўтказиб юбориш 6s

Ўтказиб юбориш

Каннаваронинг дебюти Кувайтга қарши ўйинга тўғри келди. Италиялик мураббий билан келишув ўйин арафасида имзолангани сабаб бу ўйинларга жамоани Темур Кападзе бошлаб тушиши, Каннаваро шунчаки томошабин сифатида кузатиши ҳам мумкин эди. Лекин Фабио тезда ишга киришишни истаб, Кападзе билан тандемда жамоани бошлаб тушди.

Кувайт билан ўйинда Ўзбекистон жиддий муаммога дуч келмаслиги аниқ эди, ҳозир жамоалар ўртасидаги фарқ катта. Миллий жамоа кутилганидек, осон ғалабага эришди. Лекин эътибор қилган бўлсангиз, барча футболчилар ўртоқлик ўйинларига хос бўлмаган ўзгача иштиёқ билан ҳаракат қилишди. Бу табиий, футболчилар янги мураббийга ўзини кўрсатишни истайди. Айниқса Ҳожимат Эркинов жуда фаол ўйнади. Каннаваро миллий жамоанинг асосий кучи шу йигит бўлса керак деб ўйлагандир ҳам.

Шомуродовнинг ҳисобни очувчи голи, Каннаваронинг айтишича, машғулотларда ўйланган комбинация экан. Комбинация ҳам эмас аслида, марказий ҳимоячи Ҳамралиев тўпни тўғри ҳужум чизиғига етказиб берди, Шомуродов яккама-якка вазиятдан аниқ фойдаланди. Демак Каннаваро машғулотда нималарнидир ўзгартиришни бошлаган кўринади.

Илк синов

Йиғин доирасидаги иккинчи ўйин Уругвайга қарши ўтказилди. Агар иккинчи ўйин ҳам Кувайт каби Осиёнинг ўртамиёна жамоасига қарши кечса, Каннаваронинг мураббийлиги ҳақида ҳеч нарса айтолмасдик. Чунки мураббийнинг даражаси жиддий ўйинларда билинади. Тўғри, Уругвай асосий таркиби билан ўйнамади, бу шунчаки ўртоқлик ўйини эди, лекин шундай бўлса-да, Каннаваро ўзини кўрсатиши учун жуда яхши рақиб.

Уругвай билан учрашувда италиялик мураббий Ўзбекистонни буткул бошқа жамоага айлантириб қўйгани йўқ, албатта. Бироқ Жанубий Американинг топ жамоасига қарши ўйинда миллий жамоа сочилиб кетгани ҳам йўқ. Ўйин давомида Уругвайга босим қилишди, иккинчи бўлим охирида устунлик ҳам биз томонда бўлди. Хуллас, тартибли ўйин кўрсата олишимизни исботладик. Ўзи Катанец келганидан кейин Ўзбекистон анча совуққон, интизомли ўйин кўрсатадиган бўлди. Ҳа, Каннаваро ҳали ўзгача нимадир қила олгани йўқ, лекин жамоа зарарига ишлайдиган қарорлар ҳам қабул қилмаган кўринади.

Каннаваро Япония, Корея ёки Эронга қарши расмий ўйин ўтказганида унинг имкониятларини тезроқ билиб олардик. Менимча, энди унинг қандай мураббий эканини шу билан жаҳон чемпионатида биламиз, чунки ўртоқлик ўйинлари бундай имконият бермайди.

Янги футболчилар бўладими?

Таркибга қараганда бу ҳамон Темур Кападзенинг жамоаси. Каннаваро шунчаки ўзбекистонлик ҳамкасби танлаган футболчиларга кўрсатма берган. У ўзбек футболчиларини энди таний бошлади. Ноябрда яна ФИФА кунлари бор, ўша йиғинга чақирилган футболчилар катта эҳтимол Каннаваронинг асосий таркиби бўлади. Мураббий Ўзбекистонда қолиб чемпионат ўйинларини кузатишини айтди. Футболчилар ўйинларини видеода кўриш билан майдонда томоша қилиш ўртасида фарқ катта.

Мураббий чемпионат ўйинларини кузатиб янги футболчиларни жалб қилса, жуда яхши. Чунки ҳар қанча легионерлар кўп бўлмасин, мамлакат футболи даражасини ички чемпионат акс эттиради. Миллий жамоага қанча кўп номзодлар бўлса, шунча яхши. Чунки исталган пайтда қайсидир футболчи сафдан чиқиши мумкин, унинг ўрнига чақириш учун ички чемпионатда номзодлар бўлиши керак.

Охирги йиғиндаги бир ҳолат одамни хафа қилади. Ички чемпионатдан бир неча футболчи миллий жамоага чақирилди, лекин барибир олдинги ўйинларда ҳаракат қилган футболчилар майдонга тушди. Ахир ўртоқлик ўйинларидан мақсад янги номзодларни синаб олиш эмасми? Наҳотки Ўзбекистон чемпионатида ўтган ойнинг энг яхши футболчиси деб топилган Рустам Турдимуродов ҳеч бўлмаса 15-20 дақиқа майдонга тушишга муносиб бўлмаса? Унинг айби «Сурхон»да ўйнашими?

Чемпионатга, чемпионатдаги футболчиларга асло беписанд муносабатда бўлиш керак эмас. Одатда миллий жамоага доимий 3-4 клуб футболчилари ва легионерлар чақирилади, бўлди. Бу борада Англиядан ўрнак олсак арзийди. АПЛ ўйинларини кузатсангиз, «Нюкасл»даги гигант ҳимоячи Ден Бёрнни танисангиз керак. Ўз вақтида «Нюкасл» академиясидан ҳайдалиб, кейин дўконда ишлаб юрган Ден 29 ёшида жонажон клуби билан шартнома имзолаганди.

Шу йил 33 ёшида Бёрн илк марта Англия миллий жамоасидан чақирув олди. Кўп ўтмай «Нюкасл» билан Лига кубогини ютиб, финалда «Ливерпул» дарвозасига гол урди. Миллий жамоа ана шунақа нарса, футболчини янги даражага олиб чиқади.

Ёки бўлмаса 2012 йилдаги олимпиада ўйинлари финалини эсланг. Неймар бошчилик даҳшатли Бразилия финалда Мексикага 1:2 ҳисобида ютқазади. Ҳар икки жамоада Европада ўйнайдиган юлдузлар кўп эди. Мексикаликларнинг икки голига эса ҳеч қачон чет эл клубларида ўйнамаган «Сантос Лагуна» деган жамоа футболчиси Ориго Пералта муаллифлик қилади. Ўшанда 28 ёшда бўлган йигит 23 ёшдан катталар учун ажратилган уч кишилик лимит доирасида олимпиадага олиб борилганди.

Бунақа мисолларни кўп келтириш мумкин. Фабио Каннаваро чемпионат ўйинларини кузатишни жуда истаётгани шахсан мени хурсанд қилди. Дунёга яхши футболчи бўлганидек, яхши мураббий ҳам эканини кўрсатишни истаётган Каннаваро учун Ўзбекистон жуда зўр жой. Умид қиламан, у фақат легионерларга ишониб қолмай, чемпионат ўйинларини ҳам кузатиб, ўзининг Ден Бёрн ва Ориго Пералталарини топа олади.

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.