«Тўпни яхши ушлаб туролмадик» – футболчилар турнирни тарк этгандан кейин нималар дейишди?

ЖЧ гуруҳ босқичи сўнгги тури доирасида Конго ДР билан ўтказилган ўйиндан кейин миллий жамоа футболчилари микст-зонада турли нашрлар журналистларининг саволларига жавоб қайтаришди.

Миллий жамоа сардори Элдор Шомуродов «Спорт-Экспресс» мухбири билан суҳбатда бундай даражадаги ўйинларда фақат бир жиҳатда кучли бўлишнинг ўзи етарли бўлмаслиги ҳақида гапирган.

— Катта тажриба орттирдик, аммо афсуски, ҳеч бўлмаганда битта ўйинда ғалаба қозона олмадик. Ҳаёт давом этади. Энди нимага интилишимиз ва қандай ривожланишимиз кераклигини биламиз. Жаҳон чемпионатида қатнашдик, аммо буни яхшироқ амалга оширишимиз мумкин эди, деган туйғу бор. Натижа салбий бўлса-да, бу турнирдан олиб кетишимиз мумкин бўлган кўплаб ижобий жиҳатлар ҳам бор. Бу турнир биз ҳали кўп нарсани ўрганишимиз ва ўсишимиз кераклигини кўрсатди.

— Нима етишмади? Ёки Ўзбекистон жамоасининг асл даражаси шуми?

— Кўп нарса етишмади. Бу ерда барчаси бошқача. Бу ерда битта нарсада бошқалардан яхшироқ бўлишинг етарли эмас, балки барча жиҳатларда кучлироқ бўлишинг керак. Шунинг учун, биз барча жабҳаларда қўшишимиз керак. Жамоамизнинг ҳозирги даражаси шу экан. Жаҳон чемпионатида оддий ўйинлар бўлмайди, бу ерда майда хатоларни ҳам жазолашади. Бизга тажриба етишмади ва энди бу тажриба ҳосил бўлди.

— Фабио Каннаваро ҳам матбуот анжуманида тажриба етишмагани ва иккинчи бўлимда фақат узун узатмалар билан ўйналганини айтди, бундай ўйнаш олдиндан режада бўлмаганми?

— Ҳа. Бунинг руҳий томони ҳам бор – ҳисобда олдинда бораётганингда, гол ўтказиб юбормаслик ва ҳисобни сақлашни истайсан. Ва шундан хатолар бошланади. Бундай хатолардан бири тўпни яхши ушлаб тура олмаганимиз бўлди.

— Жамоа турнирда кутганингиздан ёмонроқ ўйнадими?

— Жаҳон чемпионатига келиб, Колумбия ва Португалияга қарши майдонга тушсанг, қийин бўлишини тушунасан. Агар истасанг, бунга ижобий қарашинг мумкин. Аммо майдонда бошқа даражага гувоҳ бўласан. Биз қўлимиздан келганини қилдик. Ўйлайманки, Ўзбекистон футболи бизнинг бу ерга келишимиздан кўп нарса ютди. Истеъдодли ёшларимизни ҳам кузатишди. Энди Европада футболчиларимиз кўпроқ бўлиши мумкин.

— Африка жамоалари бу чемпионатда осиёликларга қараганда яхшироқ иштирок этишди. Бу уларнинг конфедерацияси сизникидан кучлироқ деганими?

— Фақат жисмоний томондан. Европада ўйнайдиганлар – «физика» ва техника уйғунлиги нима эканини билади. Конголикларнинг эса барчаси ўша ерда ўйнайди. Бундай рақибга қарши доим ҳимояланиш жуда қийин. Барибир тўпга эгалик қилиш керак эди!

— Иккинчи бўлимда жамоангиз ҳужум қилишни тўхтатди, ҳужумга ўтганда ҳам фақат икки-уч киши бўлиб. Бу Фабио Каннаваронинг кўрсатмаси эдими ёки футболчиларнинг ташаббусими?

— Ҳа, агар гол урсак, қандай қилиб бўлмасин ҳисобни сақлаб қолишимиз керак, деган руҳий кайфият бор эди. Аммо Конгога ҳам ғалаба кераклиги ўз сўзини айтди, бу жамоа жисмонан жуда кучли эди. Шунинг учун улар фақат олдинга боришди ва бизни ҳимоядан ўйнашга мажбур қилишди. Қолганини ўзингиз кўрдингиз.

Биз тўпни яхшироқ ушлаб туришимиз мумкин эди. Фақат бир жиҳатда яхши бўлиш етарли эмаслигини айтганимда шуни назарда тутгандим. Агар сиз прессингда яхши бўлсангиз, аммо тўп билан яхши ишлай олмасангиз, бу муаммо барибир фош бўлади ва бунинг учун жазоланасиз. Ҳаммаси тажрибага боғлиқ. Бошқа даражадаги ўйин суръатини, бунга одатланган футболчиларни кўрганингда, буни ўрганиш кераклигини тушунасан.

— Урган чиройли голингиз ҳақида айтиб беринг. Тўпни дарвозабон устидан «парашют» қилиб ташлаш фикри қандай келди?

— Гол чиройли чиқди, аммо бизга ёрдам бермади. Гол уриш доим ёқимли ва ўшанда ҳиссиётлар ижобий эди. Аммо асосийси – жамоа ғалабаси, ютқазганимиз туфайли гол завқи ҳам бутунлай йўққа чиқди.

— Шунга қарамай, жаҳон чемпионатларидаги голларингиз ҳисобини очиш муҳимдир?

— Албатта, мен учун бу муҳим. Барибир буни эслаб юрасан – ҳар куни ҳам жаҳон чемпионатида гол уриб юрмайсан. Аммо ютганимизда – янада яхшироқ бўларди.

— Ўша вазиятда Аббос Файзуллаев тўпга текканмиди? Яъни голли узатмани у берганми?

— Ўзи тўпга тегинганини айтди!

— Бу ердан қандайдир қимматли футболка олиб кетяпсизми? Колумбия ва Португалия билан ўйинлардан кейин футболка алмашдингизми?

— Менда футболка алмашадиган кайфият йўқ эди.

— Сречко Катанец, Тимур Кападзе билан таққослайдиган бўлсак, Каннаваро – жамоага нима берди?

— Кўп ижобий нарсалар! Битталаб айтиб ўтирмайман, лекин шуниси аниқки, чемпионатда у хоҳлагандек ўйнаш учун кўп вақтимиз бўлмади. Профессионал жиҳатдан у футболчиларга кўп нарса беради ва ўргатади. Ўйин темпини, профессионалликни ва бундай даражада ўйнаш учун керакли бўлган бошқа барча жиҳатларни.

Ўзбекистон миллий жамоасининг жаҳон чемпионатларидаги илк голи муаллифи бўлган Аббос Файзуллаев эса «Чемпионат» мухбирига берган интервюсида жамоа ўз даражасида ўйнай олмади, деб ҳисоблашини айтган.

— Натижага қарамасдан, орзу амалга ошди, дейиш мумкинми?

— Жаҳон чемпионатида ўйнаганимизни назарда тутадиган бўлсак – ҳа. Аммо бу етарли эмас. Мен ғалаба қозонишни хоҳлайман. Биз эса буни уддалай олмадик. Умид қиламанки, кейинги жаҳон чемпионатига чиқамиз ва ўз ғалабаларимизни қўлга киритамиз. Ҳозир эса жуда чарчадим.

— Яхшироқ ўйнашингиз мумкинмиди? Ёки бу максимумми?

— Йўқ, бу максимум эмас. Биз нимага қодирлигимизни, қандай футбол ўйнай олишимизни биламан. Шунчаки бу ерда буни кўрсата олмадик.

Миллий жамоа ҳимоячиси Рустам Ашурматов ҳам «Спорт-Экспресс» мухбирига берган интервюсида жамоа бундан яхшироқ натижа қайд этиши мумкин бўлганини таъкидлаган.

— Яхшироқ ўйнашимиз мумкин эди ва биз, албатта, хафамиз. Биз биринчи жаҳон чемпионатини орзу қилардик – лекин, албатта, шунчаки ўйнашни эмас, балки очко тўплаш ва ғалаба қозонишни ҳам истардик. Ўхшамади. Сабаблар жуда кўп ва ҳозир улар ҳақида холисона гапиришга ҳали эрта. Шуниси аниқки, қайсидир паллаларда нотўғри ҳаракат қилинди. Бу бизнинг биринчи жаҳон чемпионатимиз ва бу биз учун сабоқ бўлиши керак.

— Қайси ўйин барчасидан аламлироқ бўлди? Колумбия билан ўйинда ҳисобни тенглаштиргандингиз, бугунги ўйинда ҳисобда олдинда бордингиз...

— Барчаси аламли. Колумбия билан ўйинда дуранг ўйнашимиз, бугун ғалаба қозонишимиз мумкин эди. Биз бу жаҳон чемпионатини жуда узоқ вақт – 34 йил кутгандик! Аммо ўхшамади – ҳеч бўлмаганда битта очко қўлга кирита олмадик.

— Конго ДР билан ўйиннинг биринчи бўлимини жуда яхши ўтказгандингиз, уни ютдингиз. Иккинчи бўлимда нима ўзгарди?

— Биз яхши тайёрлангандик, яхши бошладик, дарҳол дарвозани ишғол этдик – ҳисобга олинмаган бўлса ҳам. Кейин яна гол урдик. Гол уриб олганимиздан кейин нимадир ўзгарди, деб ҳисобламайман. Биз шундай ўйнашда давом этдик. Аммо рақиб ҳам ўйинга яхши тайёрланганди. Уларга ғалаба керак эди ва гол ўтказиб юборишганидан кейин янада фаолроқ ҳаракатланишди. Шундан кейин барчаси биз хоҳлаганимиздек кечмади.

— Конголиклар дарвозасига жуда чиройли гол урган сардор Элдор Шомуродов учун хурсандмисиз?

— Албатта, у менинг энг яхши дўстим ва жамоамиз сардори! У гол ургани, ўйинда ҳам, турнирдаги голлари бўйича ҳам ҳисобни очгани зўр бўлди. Афсуски, бу ғалаба қозонишимизга ёрдам бермади.

— Конголиклар билан ўйиндан кейин Фабио Каннаваро нималар дейишга улгурди?

— Албатта, у ҳам ғалабани хоҳлаганди. Айтишим мумкинки, у биз учун, жамоа учун барчасини қилди. Унинг хафалиги бизникидан камроқ эмас. У барчасини ортда қолдириш кераклиги ва олдинда Осиё чемпионати турганини, унга ҳам тайёрланишимиз кераклигини айтди.

— Уч мағлубият фонида Каннаваро ва футболчилар орасидаги муносабатлар ёмонлашмадими?

— Йўқ-йўқ, мураббийлар штаби билан барчаси ажойиб. Ҳеч қандай муаммо йўқ.

— Афтидан, мухлислар ҳақида ҳам шу гапни айтиш мумкин. Учта ўйинда ҳам мағлубиятга қарамай, улар трибуаларда қолишди ва сизлар билан илиқ хайрлашишди.

— Ҳа, тўғрисини айтсам, бу одамни хурсанд қилади. Чунки жамоа ютқазганида, улар бизни қўллаб-қувватлашди, бу жуда қийин. Шунинг учун, уларнинг реакцияси – бизга катта иштиёқ беради. Уларга жамоани охиригача қўллаб-қувватлаганлари учун катта раҳмат.

Миллий жамоа ҳужумчиси Игор Сергеев хатолар устида ишланишини таъкидлаган.

«Мен ўйин пайтида ҳам айтдим, ҳозир ҳам йигитларга такрорладим, бошни эгмаслик керак. Ҳа, аламли, ҳа, ёқимсиз. Тўғри, бу ҳаммага, бизга ҳам, яқинларимизга ҳам, бутун мамлакатга ҳам оғир. Лекин олдинга ҳаракат қиламиз, ишлаймиз, таслим бўлмаймиз. Менимча, энди икки-уч баробар кўпроқ меҳнат қиламиз», – дея унинг сўзларини келтиради Gazeta.

У ўйиндан кейин Фабио Каннаваро кийим алмаштириш хонасида футболчиларга нима дегани ҳақидаги саволни очиқ қолдирган: «Келинг, бу жамоа ичида қолсин. Унинг ҳам ўз хавотир ва кечинмалари бор эди. У шундай гапларни гапирдики, менимча, улар кийим алмаштириш хонасида қолиши керак».

Сергеев жамоа турнир бошланишидан олдин ҳам рақибларнинг кучини яхши англаганини таъкидлади.

«Биз ҳам ёш бола эмасмиз, рақиблар жиддий, топ-жамоалар эканини тушуниб тургандик. Португалия ҳам, Колумбия ҳам, ўша Конго ҳам. Негадир ҳамма уларни ҳисобдан чиқариб қўйганди, лекин биз видеоларини кўргандик. Жуда яхши шаклланган жамоа. Умидларимиз катта эди, камида гуруҳдан чиқишни кўзлагандик. Аммо нима бўлган бўлса, бўлди», – дейди у.

Учта мағлубиятдан кейин бўлиши мумкин бўлган танқидлар ҳақида гапираркан, ҳужумчи жамоа илгари ҳам бундай салбий муносабатни бошдан кечирганини айтиб ўтди.

«Норози бўладиган одамлар топилади. Футболни тушунмайдиган, шунчаки, томоша қилиб, ютишимизни хоҳлайдиган одамлар ҳам бор. Мен уларни тушунаман. Жамоада бизни роса танқид остига олишган пайтлар ҳам бўлган. Лекин биз ўсяпмиз ва жаҳон чемпионатига чиқдик. Бундай салбий қарашлар эса ўтиб кетади», – деди Сергеев.

Унинг сўзларига кўра, ҳозир миллий жамоани аввалгидан кўра кўпроқ қўллаб-қувватлашмоқда.

«Барибир, ютқазаётганимизга қарамай, бизни қўллаб-қувватлаётганлар кўп. Тарихимизда илк бор жаҳон чемпионатига чиққанимизнинг ўзи жуда яхши натижа. Бу халқ учун, футболга қизиқмайдиган, уни доим томоша қилмайдиган ва футболнинг ички оламидан хабари йўқ инсонлар учун ҳам жуда катта ижобий туртки бўлди», – деди у.

Ҳужумчи Португалия билан ўйиндаги натижа умумий таассуротга соя солганини тан олди.

«Бешта тўп ўтказиб юбориш – бу кўп, албатта. Лекин салбийлик кўришни хоҳлаган одам, доим салбийлик топади. Ижобийликни кўришни истаган одам эса, ҳар доим яхшиликни кўра олади. Ҳа, ютқаздик, лекин ёмон тажриба ҳам тажриба. Бундан ҳам хулоса чиқариб, ўрганиш мумкин ва фақат олдинга ҳаракат қилиш керак», – дея таъкидлади Сергеев.

Келажакдаги мақсадлар ҳақида гапираркан, Сергеев миллий жамоа жаҳон чемпионатидаги дебютдан сўнг ортга қадам ташламаслиги кераклигини таъкидлади.

«Менинг шахсий [умидларим] — ортга қадам ташламаслик. Қандай ривожланган, қандай йўл босган бўлсак, майли секин, майли кичик қадамлар билан бўлса ҳам, худди шундай олдинга ҳаракат қилишда давом этишимиз керак. Ушбу жаҳон чемпионатида нималарга қодирлигимизни кўрсата олмадик. Хатолар бўлди. Энди кейингисига чиқишга ҳаракат қилишимиз, бу ерга шунчаки бир марта тасодифан келиб қолмаганимизни, балки ҳар сафар барқарор равишда йўлланма олишимизни исботлашимиз керак. Кейин эса гуруҳдан ҳам мунтазам чиқишга интилишимиз лозим», – деди у.

У бундай мақсадлар амбицияли кўриниши мумкинлигини, аммо жамоа босқичма-босқич ҳаракат қилиши кераклигини қайд этди. «Тўғри, бу бироз катта режалардек туюлиши мумкин, лекин маҳаллий чемпионатимиз ҳам ўсиши, биз ҳам олдинга кетишимиз учун қадамма-қадам ҳаракат қилиш лозим. Мен айнан шуни хоҳлайман. Шунчаки жаҳон чемпионатига чиқдик, келдик, катта раҳмат, энди яна 30 йил кутамиз, деган нарса бўлмаслиги керак. Мана шуни истамайман», – деди Сергеев.

Ҳужумчи Осиё кубогида Ўзбекистон миллий жамоаси олдига анча юқори вазифалар қўйилиши лозимлигини қайд этган. «Осиёда вазифалар бироз бошқача ва менимча, у ерда чемпионлик учун курашиш қўлимиздан келади», – дея таъкидлади у.