Трамп Зеленский билан учрашди ва Tomahawk ракеталари бўйича АҚШ позициясини тушунтирди

АҚШ президенти Доналд Трамп 17 октябр куни Украина раҳбари Володимир Зеленский билан Вашингтондаги Оқ уйда учрашди.

Трамп Украина учун Tomahawk ракеталари зарур бўлмаслигига умид билдирди.

«Биз бу жараённи соддалаштиришга интилаётганимизнинг сабабларидан бири шундаки, гап жуда катта миқдордаги жуда кучли қуроллар ҳақида кетмоқда. Демак, бу биз муҳокама қиладиган масалалардан бири. Умид қиламанки, уларга зарурат туғилмайди. Умид қиламанки, биз Tomahawk ракеталарини қўллаш ҳақида ўйламасдан ҳам урушни тугатишга муваффақ бўламиз», деди Трамп.

Зеленский урушни технологик можаро деб атади ва «бошқа воситалар - кўплаб дронлар кераклигини» айтди. Шунингдек, у Трампга биргаликда ишлаш ва биргаликда дрон ишлаб чиқаришни таклиф қилди.

«Бизда турли хил қуроллар кўп. Биз мамлакатни тўлиқ жиҳозлашимиз керак. Биз урушни тугатишимиз учун Украинага Tomahawk керак бўлмаслигини истардик», деди Трамп ва АҚШ Tomahawk ўрнига дрон беришдан манфаатдор бўлишини айтди.

Трампнинг фикрича, Владимир Путин, худди Володимир Зеленский каби, уруш тугашини истайди, «шунинг учун энди биз буни амалга оширимиз керак».

АҚШ президенти Будапештда Путин билан учрашуви катта эҳтимол билан Зеленский иштирокисиз ўтишини айтди.

Аввалроқ Трамп агар Россия билан уруш ҳал этилмаса, Украина ракеталар олиши мумкинлигини айтганди.

Москва Украинага Tomahawk ракеталарининг берилишига мутлақо қарши эканини маълум қилиб келмоқда. Путиннинг огоҳлантиришича, Tomahawk ракеталари жанг майдонидаги вазиятни ўзгартирмайди, бироқ АҚШ ва Россия ўртасидаги муносабатларга салбий таъсир кўрсатиши мумкин.