Трамп Мадурони ағдармоқчи – сенатор Грэм

Республикачи сенатор сўзларига кўра, Мадуро – «наркотеррорчи, наркосавдогар ва ноқонуний президент».

Фото: AFP

Сенатор Линдси Грэм АҚШ президенти Доналд Трамп Венесуэла президенти Николас Мадурони ағдариш учун шароит яратишини айтди. Бу ҳақда республикачи Fox News эфирида шундай деди:

«Доналд Трамп Мадурони тахтдан ағдармоқчи. Ҳамма Мадуронинг ёмонлиги ҳақида гапиради. У ағдарилади. У наркотеррорчи, наркосавдогар, ноқонуний президент ва Трамп унинг қулашига олиб келадиган шароитларни яратади».

Грэм сўзларига кўра, Венесуэла - «Мадуро томонидан бошқариладиган, Эрон билан алоқалари бўлган наркотеррорчи давлат».

Сенатор президентнинг Венесуэладан гиёҳванд моддалар олиб кетаётган кемаларга зарба бериш қарорини алоҳида қайд этиб, энди АҚШ нафақат кемаларнинг ўзини, балки уларга гиёҳвандлик моддасини юклаётганларни, шунингдек, «наркокартелларни бошқараётган наркотеррорчилар»га бошпана берган мамлакатни ҳам таъқиб қилишини айтди.

Fox News бошловчиси Шон Хеннитининг эслатишича, Грэм аввалроқ Трамп билан Венесуэлада мухолифат етакчиси, тинчлик бўйича Нобел мукофоти совриндори Мария Корина Мачадонинг ҳокимият тепасига келиши мумкинлигини муҳокама қилган.

Ўтган ҳафта Трамп Венесуэла етакчиси АҚШга кескинликни юмшатиш бўйича бир нечта таклифлар билан мурожаат қилгани ҳақидаги хабарларни очиқ тасдиқлади. Трамп телекўрсатувда шундай деди: «У ҳамма нарсани таклиф қилди. У ҳамма нарсани таклиф қилди. Биласизми, нима учун? Чунки у Қўшма Штатлар билан ўчакишишни истамайди».

АҚШ ва Венесуэла ўртасидаги муносабатлардаги кескинлик сўнгги бир неча ҳафта ичида кучайиб бормоқда. Қўшма Штатлар Мадурога таҳдид қилмоқда ва аллақачон Венесуэладан гиёҳванд моддалар олиб кетаётган кемаларга бир қатор зарбалар берган.