Акром Имомўғлига жосуслик айби қўйилди

Истанбул шаҳри мэри Акром Имомўғлига янги айблов қўйилди: бу сафар унга қарши «сиёсий жосуслик» иши очилди. Туркия президенти Ражаб Тоййиб Эрдўғаннинг асосий рақиби ҳисобланган Имомўғли жорий йил мартидан бери коррупция иши бўйича ҳибсда; ёзда у Истанбул прокурорига қарши ҳақорат ва таҳдидлар иши бўйича 20 ойлик қамоқ жазосига ҳукм қилинганди. Сиёсатчининг ўзи барча айбловларни рад этган.

Сиёсий жосуслик иши бўйича тергов ўтган ҳафта бошланган, деб хабар берди Associated Press. Имомўғли жорий йилнинг июл ойида ҳибсга олинган, гўёки хорижий разведка хизматлари билан ҳамкорлик қилган тадбиркор билан алоқада бўлганликда гумонланмоқда.

Хусусан, Туркиянинг Anadolu давлат агентлиги хабар беришича, Истанбул мэри 2019 йилги сайловолди кампаниясини хориждан молиялаштириш эвазига шаҳар аҳолиси ҳақидаги маълумотларни беришда айбланмоқда.

Имомўғлидан ташқари, унинг кампаниясининг собиқ менежери Нежати Ўзкан ва журналист, мухолифатдаги Tele 1 телеканали раҳбари Мердан Янардағга ҳам айблов қўйилган.

Hurriyet Daily News хабарига кўра, телеканал давлат назоратига олинган, унинг YouTube канали ёпилган.

Имомўғли 26 октябр куни судда янги иш бўйича кўрсатма берди. У жосуслик айбловларини ҳам рад этди.

«Менинг фикримча, жосуслик – бу хиёнат. Римни ёқиб юборишда айбланишим бундан кўра реалликка яқинроқ бўларди», – дея унинг сўзларини келтиради турк нашрлари.

Суд биноси олдида мэрнинг юзлаб тарафдорлари тўпланди. Associated Press хабарига кўра, Имомўғли етти ой ичида биринчи марта Истанбул чеккасидаги қамоқхонани тарк этган.

Жумҳурият халқ партияси (CHP) вакили Имомўғли 2019 йилда Истанбул мэрлиги учун сайловда ғалаба қозонган. Аввалига натижалар бекор қилинганди, аммо у такрорий сайловда янада каттароқ устунлик билан ғалаба қозонганди.

CHP 2024 йилги муниципал сайловларда яна биринчи ўринни эгаллади, экспертлар ҳукмрон Адолат ва тараққиёт партияси (AKP) номзодининг мағлубиятини «Эрдўғаннинг тарихдаги энг йирик мағлубияти» деб атади.

Имомўғлининг Истанбул мэри сифатидаги ваколати 2025 йил март ойида коррупцияда гумонланиб ҳибсга олинганидан кейин тўхтатилган эди.

Имомўғли 2028 йилга режалаштирилган президентлик сайловларида Ражаб Тоййиб Эрдўғаннинг асосий рақиби бўлиши кутилган. Сиёсатчи ўз партиясининг 2028 йилги президентлик сайловлари учун номзоди сифатида кўрсатилиши керак бўлган ички сайловлардан бироз олдин қўлга олинди. Жумҳурият халқ партияси барибир Истанбул мэрини ўз номзоди сифатида танлади.

Имомўғлининг ҳибсга олиниши оммавий норозиликларга сабаб бўлди – 100 дан ортиқ одам, жумладан, кўча акцияларини ёритган BBC мухбири Марк Лоуэн қўлга олинди, кейинчалик у Туркиядан депортация қилинди.

Имомўғлининг тарафдорлари унинг таъқиб қилинишини сиёсий деб ҳисоблайди ва турк адлиясининг мустақиллигига ишонмайди.