“Ғазо матбуотда кўрсатилаётганидек эмас, бомбалаш давом этяпти” – Фаластин парламенти вице-спикери

Kun.uz мухбири ўтган ҳафта Швейцариянинг Женева шаҳрида ўтган парламентлараро иттифоқнинг 151-ассамблеяси қатнашувчилари, спикерлари билан мулоқотда бўлди. Хусусан, Фаластин парламентининг вице-спикерига кўра, унинг мамлакатини давлат сифатида эртами-кеч ҳамма барибир тан олади.

Ундан яқинда Мисрнинг Шарм аш-шайх шаҳрида АҚШ президенти Доналд Трамп иштирокида имзоланган келишув ҳақида сўралганда – сиёсатчи Ғазода ҳали уруш давом этаётганини айтди. Ҳужжатни имзолаш эмас, унинг бандларига амал қилиш муҳимроқ, дейди Фаластиндаги Миллий кенгаш раиси ўринбосари Муса Ҳадид.

— Биз биламизки, сизнинг мамлакатингиз, Фаластин, узоқ вақтдан бери азият чекмоқда. Биз у ердаги вазиятдан, бўлаётган воқеалардан хабардормиз. Президент Трамп Мисрда ушбу урушга чек қўювчи ҳужжатга имзо чекди, у ерда қатнашганлар буни “аср келишуви” деб аташмоқда. Албатта, уруш тўхтатилиши керак. Сизнинг фикрингизча, шу билан уруш тўхтайдими?

“Ишонамизки, бу биз эришмоқчи бўлган ўт очишни тўхтатиш учун олдинга қўйилган қадамдир. Шундай бўлса-да, тарафлардан бири тинчлик келишуви учун муросага келиши керак. Ва биз Исроил келишувни қай даражада бажаришини кўрамиз, буни вақт кўрсатади. Афсуски, ҳозир Ғазода бўлаётган ишлар сиз медиада ўқиётганингиздек эмас, чунки улар ҳамон Ғазони бомбардимон қилмоқда, у ердаги одамларни ўлдирмоқда, гуманитар ёрдамнинг Ғазога киришига тўсиқлар қўймоқда. Ғазода одамлар ҳамон очарчиликдан қийналяпти. Шу сабабли, Шарм аш-шайхдаги ушбу келишувнинг имзоланишидан кўра 100 фоиз бажарилиши муҳим. Биз бу келишувнинг нафақат хавфсизлик ва гаровга олинганларни озод қилиш, балки барча йўналишларда ишлашини истаймиз. Ғазода қарийб икки миллион киши яшайди. Улар азият чекмоқда”.

— Нега президентлар Шарм аш-шайхда икки давлат тамойилидан келиб чиқиб, мустақил Фаластин давлатини тузиш ҳақида лом-лим демади?

“Биласизми, бизнингча, Шарм ал-шайхдаги саммит ўт очишни тўхтатиш ва Ғазода азият чекаётган Фаластин халқига гуманитар ёрдам кўрсатиш масалаларини муҳокама қилиш учун эди. Аммо афсуски, биз Нью Йоркда нима бўлганини гапиришимиз керак.

Чунки у ерда, БМТда биз ўз позициямизни айта олмадик, улар бизга виза беришдан бош тортишди. Шунга қарамай, барча давлатлар, 100 дан ортиқ мамлакатлар Нью Йоркда биз томон бўлди. Бу “икки давлат” ечимини амалга ошириш учун “йўл харитаси” бўлиб, Фаластинни ҳали тан олмаган давлатларни буни имкон қадар тезроқ амалга оширишга ундайди, деб биламан”.

Женевада нутқ сўзлаган вице-спикер унинг ҳукумати эртами-кеч Фаластиннинг дунё томонидан тан олинишига ишонишини айтади. Гап Фаластиннинг тарихий ҳуқуқлари ҳақида кетмоқда, 78 йил ўтиб, ҳалиям давлат сифатида тан олинмадик, дейди Муса Ҳадид.

“Дарвоқе, Исроил БМТ резолюцияси билан ташкил этилган, аммо ушбу резолюцияда икки давлат – Исроил ва Фаластин бўлиши кераклиги аниқ кўрсатилган эди. Шундай қилиб, дунё 1948 йилда Исроилнинг ташкил этилганини тан олди, бироқ Фаластиннинг ташкил этилганини ҳали тан олгани йўқ. Ҳозир биз ана шу жараёндамиз. Ишонаманки, яқин келажакда аксарият мамлакатлар уни тан олади. Биз уларнинг барчасини бу қадамни имкон қадар тезроқ ташлашга ундаймиз. Ва бу фаластинликлар учун эмас, балки халқаро ҳуқуққа, кўп йиллар аввал қабул қилинган халқаро резолюцияларга риоя қилиш учун керак”, дея қўшимча қилади у.