БМТ ХК Сурия раҳбариятидан санкцияларни олиб ташлади: аш-Шаръа 10 ноябр куни Вашингтонга боради

БМТ Хавфсизлик кенгаши Суриянинг ўтиш даври президенти Аҳмад аш-Шаръа ва мамлакат ички ишлар вазири Анас Ҳаттабни ИШИД ва “Ал-Қоида”га оид халқаро санкциялар рўйхатидан чиқарди. Мос баёнот 6 ноябр куни БМТ сайтида эълон қилинди.

АҚШ таклиф этган резолюция учун Хавфсизлик кенгаши аъзоларидан 14 нафари (Россияни ҳам қўшган ҳолда) овоз берди, Хитой бетараф қолди. Ҳужжат матнида “Сурия Араб Республикасининг суверенитети, мустақиллиги, ҳудудий яхлитлиги ва миллий бирлигига тўла ҳурмат” таъкидланган.

Dpa агентлигига кўра, Буюк Британия, Россия, Франция ва Покистон вакиллари бу қарорни Сурия иқтисодий тикланиши йўлида муҳим қадам деб атади. Сурия ҳокимияти эса санкцияларнинг бекор қилинишини мамлакатнинг янги раҳбариятига нисбатан “ишончнинг ортиши” ва халқаро ҳамжамиятга қайта интеграция имконияти сифатида баҳолади.

10 ноябр куни Сурия президенти Вашингтонга илк ташрифини амалга оширишни режалаштирмоқда. АҚШ президенти Доналд Трамп билан учрашувда у АҚШ бошчилигидаги ИШИДга қарши коалицияга қўшилиш тўғрисидаги келишувни имзолаши кутилмоқда. Reuters қайд этганидек, ХК санкцияларни бекор қилиш бўйича овоз бермаган тақдирда ҳам бу ташриф амалга ошиши мумкин эди — чунки БМТ ХК санкциялар қўмитаси аввалроқ Суриянинг вақтинчалик ҳукумати раҳбарига сафар рухсатномаларини берган.

Қўшма Штатлар сўнгги бир неча ой давомида ХК аъзоларини Сурияга нисбатан санкцияларни юмшатишга чақириб келди. Май ойида Трамп Вашингтоннинг Сурияга нисбатан сиёсатини жиддий ўзгартирганини эълон қилиб, АҚШ жорий этган иқтисодий чекловларни бекор қилишини айтган эди.

Аш-Шаръа 2024 йил охирида Башар Асадни ағдаришидан олдин Абу Муҳаммад ал-Жўланий номи билан танилган. У шу номда 2003 йилда АҚШ бошчилигидаги халқаро коалиция кучларига қарши курашган. 2006 йилда АҚШ ҳарбийлари томонидан қўлга олинган ва беш йилни Ироқ турмаларида ўтказган.