Тошкент метроси бекатларида кичик кутубхоналар тармоғи очилди

Тошкент метрополитенининг «Алишер Навоий» ва «Пахтакор» бекатлари ўтиш қисмида китоб жавонлари ўрнатилди. Бу ҳақда Транспорт вазирлиги хабар берди.

Таъкидланишича, Маънавият ва маърифат маркази, «Турон Банк», Транспорт вазирлиги ва Тошкент метрополитени ҳамкорлигида амалга оширилган лойиҳа доирасида йўловчилар бекатдан-бекатгача китоб ўқиши ва уларни Мутолаа лойиҳаси орқали буюртма қилиши мумкин.

«Турон китоб бекати» деб номланган лойиҳа доирасида маҳаллий ва хорижий муаллифларнинг асарлари жойлаштирилган китоб жавонлари метрополитеннинг «Туркистон», «Ипак йўли», «Беруний», «Чилонзор», «Мингўрик», «Тошкент», «Дўстлик» метро бекатларида ҳам ўрнатилди. Келгусида кутубхоналарни ерости ва ерусти метрополитен линияларининг бошқа бекатларига ҳам ўрнатиш кўзда тутилмоқда.

Қайд қилинишича, лойиҳани амалга оширишдан кўзланган мақсад йўловчиларнинг «сафарини мазмунли ва фойдали қилиш, билим, маърифат ва китобхонлик маданиятини йўллар, бекатлар, метро йўналишларида тарғиб этишдан» иборат.