Австралия санкцияларга қарамай Россия нефтини импорт қилмоқда

Украинада уруш бошлангач, Россиядан тўғридан тўғри ёнилғи харидини тўхтатган Австралия 2023 йилдан бери Россиядан келиб чиқишга эга 3 млн тоннадaн ортиқ нефт маҳсулотларини импорт қилган. Бу ҳақда 9 ноябр куни The Guardian газетаси Энергетика ва тоза ҳаво тадқиқотлари маркази (CREA) маълумотларига таяниб хабар берди.

Нашрга кўра, миллионлаб тонна Россия нефт маҳсулотлари қисман Macquarie Австралия инвестиция банкига тегишли бўлган Сингапурнинг Журонг порти орқали ўтиб, австралиялик компанияларга етказилади. Ушбу порт Россиядан келадиган ёнилғининг қайта ишланиши ва реэкспорти амалга ошириладиган асосий марказлардан бирига айланган.

CREA мутахассиси Вайбхав Рагунандан таъкидлашича, Австралия санкциялари учинчи мамлакатлар орқали нефт маҳсулотларини сотиб олишга йўл қўяди — расман тақиқ бузилмайди, амалда эса Россия нефт саноати ва Кремлнинг солиқ тушумларини қўллаб-қувватлайди.

“Бу — австралиялик харидорлар фойдаланаётган катта лазейка. Улар қонун доирасида иш тутаётган бўлса-да, шубҳасиз, этика чегарасидан чиқмоқда”, — деди Рагунандан. Унинг сўзларига кўра, бу ишлар “албатта Австралиянинг Украинага бўлган қўллаб-қувватлашини заифлаштиради”. Ушбу лазейка нафақат Россиядан нефт етказиб беришни давом эттиришга имкон беради, балки Австралия компанияларига даромад олиш имкониятини ҳам яратади, дея қўшимча қилди эксперт.

Ҳукумат маълумотларига биноан, 2023 йил январидан Австралия нефт маҳсулотларининг деярли чорак қисмини Сингапурдан харид қилган. Ўз навбатида Сингапур Россиядан 22 млн тоннадaн ортиқ нефт маҳсулотларини импорт қилганини Kpler таҳлил агентлиги маълумотлари кўрсатади. Етказиб беришнинг тахминан учдан бири Журонг порти терминалига тўғри келган.

Macquarie вакили терминал назорати пакетидаги улуш Сингапур ҳукуматига тегишли эканини ва у Сингапур ҳамда халқаро меъёрларга тўлиқ риоя қилишини билдирди. Шу билан бирга, Австралия банки инвестицияларидан молиявий фойда олган-олмаганини ошкор этмади.