АҚШда Россияга қарши санкцияларни кучайтириш салоҳияти тугаб бормоқда – Рубио

АҚШ Давлат котиби Марко Рубио Вашингтон Москвага қарши янги санкциялар жорий этиш бўйича деярли чегарага етганини айтиб, энг йирик нефть компанияларига аллақачон чекловлар қўйилганини ва кейинги қадамлар янги санкцияларни жорий этишдан кўра, мавжуд санкцияларга риоя этилишини таъминлаш билан боғлиқ бўлишини таъкидлади. Бу ҳақда Рубио G7 давлатлари ташқи ишлар вазирларининг Канадада бўлиб ўтган учрашувидан сўнг журналистлар билан мулоқот чоғида маълум қилди.

Журналистнинг Москвага нисбатан санкциялар босимини кучайтириш ҳақидаги саволига жавоб берар экан, Рубио «аслида биз санкциялар қўллашимиз мумкин бўлган деярли ҳеч нарса қолмади» деди.

«Биз томондан унчалик кўп санкция қолмади. Айтмоқчиманки, биз уларнинг энг йирик нефть компанияларига зарба бердик, бу ҳақда ҳамма сўраган эди. Кўриниб турибдики, бу амалга ошиши керак ва улар таъсирли бўлгунча бироз вақт ўтади», деди у.

Давлат котиби Россия нефть чекловларини четлаб ўтиш учун фойдаланадиган «яширин флот» муаммосига алоҳида тўхталди. Рубио унга қарши курашни янги санкциялар учун сабаб эмас, балки «санкцияларнинг бажарилишини таъминлаш механизми» деб таърифлади.

Рубио европалик ҳамкорлар бу жараёнда фаолроқ бўлиши керак, деган фикрни билдирди, чунки кемаларнинг катта қисми «уларнинг ҳудудларига яқинроқ ўтади».

Россия ҳақиқатан ҳам тинчликка интиляптими, деган саволга Рубио фақат ҳаракатларга қараб баҳо бериш мумкинлигини айтди. Унинг фикрича, Москва «нимани хоҳлашини аниқ айтди – улар Донецк вилоятининг қолган қисмини хоҳлаяпти ва бундай талаблар Украина томони учун маъқул эмас».

Эслатиб ўтамиз, октябрь ойида АҚШ Доналд Трамп президентлигининг иккинчи муддати давомида биринчи марта Россияга, хусусан, «Роснефть» ва «Лукойл» компанияларига қарши янги кенг кўламли санкцияларни эълон қилган эди.